2029 मधील निवडणुकीबाबत मनोज जरांगे पाटलांचं मोठं विधान, म्हणाले, मराठी बांधवांसाठी…

दसरा मेळाव्यात बोलताना मनोज जरांगे यांनी राज्यकर्त्यांना थेट आव्हान दिले आहे. शेतकऱ्यांच्या विविध मागण्यांवरून त्यांनी सरकारवर जोरदार टीका केली. जरांगे यांनी स्पष्टपणे म्हटले की, “जो नेता मराठ्यांच्या विरोधात जाईल, तो 2029 ला निवडून येणार नाही.” या विधानाने राजकीय वर्तुळात मोठी चर्चा सुरू झाली आहे. जरांगे यांनी शेतकऱ्यांच्या प्रलंबित अनुदानाची मागणी करत एक रुपयाही न सोडण्याचा निर्धार व्यक्त केला. तसेच, चारा छावण्या गावागावात उभारण्याची आणि पाणी टँकरने थेट गावाला पुरवण्याची मागणी केली.

50 किलोमीटर दूर छावण्या उभारल्याने वृद्ध शेतकरी आणि जनावरांची होणारी गैरसोय त्यांनी ठळकपणे मांडली. सध्याची आडमुठी धोरणे बदलण्याची गरज त्यांनी व्यक्त केली. आपले काम इमानदारीने सुरू राहील असे सांगत, ज्यांनी महाराष्ट्रातील नेत्यांना रडायला लावले, त्यांना पुन्हा रडायला लावणार अशी घोषणा त्यांनी केली. येत्या तीन महिन्यांत अधिक सक्रिय होण्याची तयारी त्यांनी दर्शवली. समाजाचा अपमान करणाऱ्यांना पाणी पाजणार, असा इशाराही त्यांनी दिला.