Pune | पुण्यात मध्यरात्री गोळीबाराचा थरार! श्रीनाथ हॉटेलवर हल्ला, वाहनांची तोडफोड, पूर्ववैमनस्यातून गोळीबार?

पुणे जिल्ह्यातील राजगड तालुक्यात मध्यरात्री गोळीबाराची थरारक घटना घडली आहे कोदवडी फाटा येथील श्रीनाथ हॉटेलमध्ये अज्ञात टोळीने दहशत माजवत गोळीबार केला. या घटनेत हॉटेलमधील वेटरसह एकजण गंभीर जखमी झाला असून त्यांच्यावर नसरापूर येथील खासगी रुग्णालयात उपचार सुरू आहेत.
मिळालेल्या माहितीनुसार, मध्यरात्री चार ते पाच जणांच्या टोळीने हॉटेलमध्ये घुसून अचानक गोळीबार केला. यावेळी हॉटेल चालकाला मारहाण करण्यात आल्याचंही समोर आलं आहे. तसेच हॉटेलबाहेर उभी असलेल्या वाहनांची तोडफोड करण्यात आल्याने परिसरात मोठी खळबळ उडाली.
प्राथमिक माहितीनुसार, पूर्वीच्या वैमनस्यातून हा हल्ला करण्यात आल्याचा संशय व्यक्त केला जात आहे. गोळीबारानंतर आरोपी घटनास्थळावरून फरार झाले असून पोलिसांनी परिसरात शोधमोहीम सुरू केली आहे. या घटनेमुळे स्थानिक नागरिकांमध्ये भीतीचं वातावरण निर्माण झालं असून पोलीस पुढील तपास करत आहेत.