Mumbai | मुंबईतील ड्रग्स प्रकरणाचं बॉलिवूड कनेक्शन उघड, दोन कलाकारांबाबत धक्कादायक माहिती समोर

मुंबईतील गोरेगाव येथील नेस्को (NESCO) येथे झालेल्या एका कॉन्सर्टने ड्रग्स पार्टीचे रूप घेतल्याचा धक्कादायक प्रकार समोर आला आहे. या घटनेनंतर राज्यात मोठी खळबळ उडाली असून दोन तरुणांचा मृत्यू झाल्याने प्रकरण अधिक गंभीर बनले आहे. या प्रकरणातील एक महत्त्वाची अपडेट समोर आली आहे.

या जीवघेण्या कॉन्सर्टमध्ये दोन बॉलिवूड कलाकारांचाही समावेश असल्याचं उघड झालं आहे. दोन्ही बॉलिवूड कलाकार उशिरापर्यंत या पार्टीत होते हे कळताच पोलिसांच्या तपासात वेग आला आहे. मात्र या दोन्ही कलाकारांचा ड्रग्स प्रकरणाशी थेट संबंध असल्याचं स्पष्ट झालेलं नाही.

या घटनेत ड्रग्सच्या ओव्हरडोसमुळे दोन तरुण-तरुणींचा मृत्यू झाल्याचे स्पष्ट झाले आहे. डॉक्टरांच्या माहितीनुसार, दोघांनी पार्टीत जाण्यापूर्वी प्रत्येकी एक-एक कॅप्सूल घेतली होती आणि नंतर आणखी एक कॅप्सूल घेतल्याने ओव्हरडोस झाल्याचा अंदाज व्यक्त करण्यात आला आहे. तर, बचावलेल्या एका तरुणीला उलट्या झाल्याने तिचा जीव वाचला असावा, असे डॉक्टरांचे म्हणणे आहे. या संपूर्ण प्रकरणाचा सखोल तपास सुरू आहे.