पुणेकरांची FDA आयुक्त तुकाराम मुंढेंकडे मोठी मागणी; नेमकं काय म्हणाले?

गेल्या काही महिन्यांपासून राज्यभरात अन्न व औषध प्रशासन (एफडीए) कडून मोठ्या कारवाया सुरू आहेत, मात्र ऑनलाइन औषध विक्रीवर कारवाई होत नसल्याने पिंपरी चिंचवड केमिस्ट असोसिएशनने तीव्र नाराजी व्यक्त केली आहे. ऑनलाइन औषध विक्रीमुळे नागरिकांच्या आरोग्याला गंभीर धोका निर्माण होत असल्याचा आरोप त्यांनी केला आहे. असोसिएशनच्या म्हणण्यानुसार, गर्भपाताच्या गोळ्या, झोपेच्या गोळ्या आणि सिरींजेस यांसारख्या अनेक प्रकारची औषधे ऑनलाइन मोठ्या प्रमाणात उपलब्ध आहेत, ज्यामुळे त्यांचा गैरवापर वाढला आहे.

ऑफलाइन मेडिकल स्टोअर्समध्ये फार्मासिस्टची उपस्थिती आणि औषधांच्या विक्रीचे रेकॉर्ड ठेवणे बंधनकारक असताना, ऑनलाइन विक्रीमध्ये या नियमांचे पालन केले जात नाही. यामुळे Schedule H1 सारख्या औषधांचा मागोवा ठेवणे अशक्य होते. या परिस्थितीमुळे तरुण पिढी व्यसनाधीन होण्याची भीतीही असोसिएशनने व्यक्त केली आहे. नागरिकांच्या जीवाशी खेळ थांबवण्यासाठी ऑनलाइन औषध विक्री पूर्णपणे बंद करण्याची मागणी करत, असोसिएशनने एफडीए अधिकारी तुकाराम मुंढे यांना या गंभीर विषयाकडे तातडीने लक्ष देण्याचे आवाहन केले आहे.