प्रभादेवीच्या भवानीमाता मंदिरात नवरात्रोत्सवाचा उत्साह; 58 वर्षांची परंपरा आजही कायम!

मुंबईच्या प्रभादेवी परिसरातील भवानीमाता देवी मंदिरात नवरात्रोत्सवाचा उत्साह मोठ्या प्रमाणात पाहायला मिळत आहे. यंदा हे मंडळ आपल्या ५८व्या वर्षात पदार्पण करत असून, भाविकांची मांदियाळी मंदिरात दर्शनासाठी गर्दी करत आहे. नाम जोशी मार्गावरील या नवरात्र उत्सव मंडळाने गेली अठ्ठावन्न वर्षे हा उत्सव मोठ्या उत्साहात साजरा केला आहे. मंडळाकडून वर्षभर विविध सामाजिक उपक्रम राबवले जातात.

यामध्ये आरोग्य शिबिरे आणि रक्तदान शिबिरे यांचा समावेश आहे. नवरात्रीच्या नऊ दिवसांमध्ये महाप्रसाद, गरबा, दांडिया यांसारख्या कार्यक्रमांचे आयोजन केले जाते, तसेच विविध क्षेत्रातील नागरिकांना आरतीचा मान दिला जातो. मंडळाच्या पदाधिकाऱ्यांनी सांगितले की, त्यांचे सार्वजनिक नवरात्र उत्सव मंडळ फक्त कला, क्रीडा आणि सांस्कृतिक उपक्रमांवरच अवलंबून नाही. तर, ते समाजसेवेलाही महत्त्व देतात. हा केवळ उत्सव नसून, समाजसेवेचा एक वेगळा मार्ग असल्याची भावना मंडळाच्या पदाधिकाऱ्यांनी व्यक्त केली. स्थानिक रहिवासी आणि भाविक या उपक्रमांना चांगला प्रतिसाद देतात.