सर्वोच्च न्यायालयाच्या दिशेने इंडिया आघाडीचा मोर्चा; राहुल गांधी, प्रियंका गांधी मैदानात, ज्ञानेश कुमार यांच्याविरोधात याचिका दाखल!

राहुल गांधींच्या कायदेशीर टीमने ज्ञानेश कुमार यांच्याविरोधात सर्वोच्च न्यायालयात याचिका दाखल केली आहे. या याचिकेच्या पार्श्वभूमीवर इंडिया आघाडीच्या नेत्यांनी सर्वोच्च न्यायालयाकडे एक मोठा मोर्चा काढला आहे. दिल्लीतील मंडी हाऊस चौकातून निघालेला हा मोर्चा सुप्रीम कोर्टाच्या दिशेने जात आहे. या मोर्चामध्ये राहुल गांधी, प्रियंका गांधी यांच्यासह इंडिया आघाडीचे अनेक प्रमुख नेते आणि मोठ्या संख्येने कार्यकर्ते सहभागी झाले आहेत.

यापूर्वी इंडिया आघाडीने सरन्यायाधीशांची भेट मागितली होती, परंतु त्यांनी भेट नाकारत यासंदर्भात थेट याचिका दाखल करण्याचा सल्ला दिला होता. त्यानुसार, राहुल गांधींच्या कायदेशीर टीमने ही याचिका दाखल केली आहे. सर्वोच्च न्यायालय परिसरात मोठ्या प्रमाणात पोलीस बंदोबस्त तैनात करण्यात आला असून, न्यायालयापासून सुमारे २०० मीटर अंतरावर बॅरिकेटिंग करण्यात आले आहे. कार्यकर्त्यांची प्रचंड गर्दी पाहता, राहुल गांधी आणि प्रियंका गांधी यांनी टेम्पोमधून सर्वोच्च न्यायालयाकडे प्रस्थान केले आहे. हा मोर्चा कायदेशीर लढाईसोबतच राजकीय एकजुटीचे प्रदर्शन करत आहे.