Ratnakar Gutte : …तरी मी महायुती सोबतच, बड्या आमदाराकडून वेगळी चूल मांडण्याचे संकेत

राष्ट्रीय समाज पक्षाचे (रासप) एकमेव आमदार रत्नाकर गुट्टे यांनी आपली राजकीय भूमिका स्पष्ट केली आहे. रासपचे अध्यक्ष महादेव जानकर यांनी महायुती सोडली तरी आपण महायुतीसोबतच राहणार असल्याची भूमिका रत्नाकर गुट्टे यांनी मांडली आहे. गुट्टे यांनी वेगळी राजकीय चूल मांडण्याचे संकेत दिले आहेत.

गुट्टेंनी सांगितले की, ते आघाडी करून लढणार असून, रासपचा एबी फॉर्म लावण्यासाठी पक्षाध्यक्ष महादेव जानकर यांनी महायुतीसोबत यावे लागेल. जानकर युतीसोबत न आल्यास आपण आपली स्वतःची आघाडी करून लढू, असे ते म्हणाले. त्यांनी देवेंद्र फडणवीस यांना राजकारणातील आपले जन्मदाते संबोधत त्यांच्याप्रती गाढ निष्ठा व्यक्त केली. भविष्यात महादेव जानकर महाविकास आघाडीसोबत गेल्यासही आपण महायुतीतच, देवेंद्र फडणवीसांसोबतच राहणार असल्याचे गुट्टे यांनी ठामपणे सांगितले. ही त्यांची भूमिका त्यांनी अनेक वाहिन्यांवर देखील यापूर्वी स्पष्ट केली आहे.