मुलीची फी भरण्यासाठी चक्क मॅरेथॉनमध्ये धावली आई, पहिला क्रमांक पटकावला अन्… काळजाला भिडणारा Video समोर

अंबाजोगाई शहरात मुलींच्या उज्वल भविष्यासाठी एका मातेने केलेल्या अतुलनीय प्रयत्नांची सध्या सर्वत्र चर्चा सुरू आहे. येथील ४७ वर्षीय समाबाई रणवीर यांनी अमृत दौड मध्ये साडी परिधान करून अनवाणी धाव घेत प्रथम क्रमांक पटकावला आहे. त्यांच्या या धाडसी आणि प्रेरणादायी कार्याचे सर्व स्तरातून कौतुक होत आहे.

समाबाई रणवीर यांनी ही दौड केवळ स्वतःसाठी नव्हे, तर आपल्या मुलींच्या शिक्षणासाठी समर्पित केली होती. कितीही संघर्ष करावा लागला तरी मुलींच्या शिक्षणापासून त्यांना वंचित ठेवणार नाही, असा निर्धार त्यांनी यावेळी व्यक्त केला. समाजात मुलींच्या शिक्षणाचे महत्त्व अधोरेखित करणारा हा एक महत्त्वाचा संदेश समाबाईंनी आपल्या कृतीतून दिला आहे. अनवाणी पायांनी धावत प्रथम क्रमांक मिळवणे हे शारीरिक आणि मानसिक बळाचे प्रतीक आहे. समाबाईंच्या या कृतीने अनेक माता-पित्यांना आपल्या मुलांच्या शिक्षणासाठी प्रेरणा मिळेल अशी आशा व्यक्त केली जात आहे. त्यांच्या या संघर्षाची आणि विजयाची गाथा आता समाजासाठी एक आदर्श बनली आहे.