कचऱ्याने हैराण नागरिक आक्रमक; MIDC कार्यालयाबाहेर टाकला कचऱ्याचा ढीग, या व्हिडीओची सर्वत्र चर्चा

संभाजीनगरमध्ये MIDC अधिकाऱ्यांच्या कार्यालयाबाहेर कचरा फेकून नागरिकांनी अनोखं आंदोलन केलं. परिसरातील वाढत्या कचऱ्याच्या समस्येमुळे संतप्त झालेल्या नागरिकांनी हा आक्रमक पवित्रा घेतला. अनेक दिवसांपासून वारंवार तक्रारी करूनही प्रशासनाकडून कोणतीही ठोस कारवाई होत नसल्याचा आरोप आंदोलकांनी केला आहे.

स्थानिक नागरिकांच्या म्हणण्यानुसार, रस्त्यांवर आणि सार्वजनिक ठिकाणी मोठ्या प्रमाणात कचरा साचत आहे. त्यामुळे दुर्गंधी पसरत असून नागरिकांच्या आरोग्याचा प्रश्न निर्माण झाला आहे. विशेषतः पावसाळ्यात परिस्थिती अधिक गंभीर होत असल्याचे त्यांनी सांगितले. प्रशासनाचे लक्ष वेधण्यासाठी अखेर नागरिकांनी MIDC कार्यालयाबाहेर कचरा टाकत जोरदार घोषणाबाजी केली.

या आंदोलनामुळे काही काळ परिसरात तणावाचे वातावरण निर्माण झाले होते. पोलिसांनी घटनास्थळी धाव घेत परिस्थिती नियंत्रणात आणली. आंदोलनकर्त्यांनी प्रशासनाने तातडीने स्वच्छता मोहीम राबवावी आणि नियमित कचरा उचलण्याची व्यवस्था करावी अशी मागणी केली आहे. दरम्यान, MIDC अधिकाऱ्यांनी नागरिकांच्या मागण्यांवर लवकरच निर्णय घेण्याचे आश्वासन दिले आहे.