Shahaji Bapu Patil : माझ्यावर दबाव पण.. माझ्या आत्म्याला माहिती भाजपसाठी किती कष्ट… कारवाईनंतर शहाजीबापूंना अश्रू अनावर

सांगोल्याचे माजी आमदार आणि शिवसेना उपनेते शहाजीबापू पाटील यांनी पंढरपूर येथील एका सभेला मिळालेल्या प्रचंड प्रतिसादानंतर आपल्या कार्यालयावर आणि कार्यकर्त्यांच्या घरावर झालेल्या पोलीस कारवाईबद्दल तीव्र नाराजी व्यक्त केली आहे. ही कारवाई पालकमंत्री जयकुमार गोरे आणि माजी आमदार दीपक साळुंखे यांच्या कटकारस्थानाचा भाग असून, विरोधकांना आपला पराभव दिसत असल्याने दबावाचे राजकारण केले जात असल्याचा आरोप त्यांनी केला.

शहाजीबापू पाटील यांनी म्हटले आहे की, त्यांच्या सभा संपताच त्यांना आणि त्यांच्या कार्यकर्त्यांना अडवून ठेवण्यात आले. ही निवडणुकीची पद्धत नाही. ते स्वतः सत्ताधारी शिवसेना-भाजप युती सरकारचा भाग असूनही त्यांना अशा प्रकारे लक्ष्य केले जात असल्याने ते भावनिक झाले. देवेंद्र फडणवीस, एकनाथ शिंदे आणि अजित पवार यांच्याकडे याबाबत तक्रार करणार असल्याचे शहाजीबापू पाटील यांनी सांगितले. या घटनेमुळे जिल्ह्याचे राजकारण बिघडल्याचेही त्यांनी नमूद केले.