पाकिस्तानातील हिंगलाज मातेचं महाराष्ट्रात स्वयंभू मंदिर! नाशिकच्या या शक्तिस्थळाचा इतिहास थक्क करणारा

नाशिक जिल्ह्यातील निफाड तालुक्यात उगवे खेड येथे श्री हिंगलाज माता मंदिराचे एक महत्त्वपूर्ण स्थान आहे. मूळ हिंगलाज मातेचे मंदिर पाकिस्तानमध्ये असले तरी, इसवी सन १२२७ मध्ये या ठिकाणी स्वयंभू मंदिराची स्थापना झाली. डोंगरपुरी नावाच्या एका संतांनी देवीला प्रसन्न करून आपल्या गावी आणले. नदीला महापूर आल्याने त्यांनी मागे वळून पाहिले, तेव्हा देवीचा दिव्य प्रकाश तिथेच स्थिरावला आणि संतांनी स्वहस्ते देवीची प्राणप्रतिष्ठा केली.

हे मंदिर साली, सिंधी, दशनाम गोसावी, गिरी, पुरी, भारती, बन, पर्वत, अरण्य अशा २७ समाजांची कुलदेवता आहे. पाकिस्तानमधील मूळ मंदिरापर्यंत जाता येत नसल्यामुळे अनेक भाविक येथे येऊन देवीचे दर्शन घेतात व आपले मनोरथ पूर्ण करतात. चैत्र नवरात्र आणि शारदीय नवरात्र असे वर्षातून दोन मोठे घटस्थापना उत्सव येथे साजरे होतात. तसेच, रक्षाबंधनच्या आदल्या दिवशी आणि शाकंभरी पौर्णिमेलाही विशेष उत्सव असतात. येथे रोज सकाळी महापूजा, दुपारी महानैवेद्य आरती आणि सायंकाळी सायंपूजा व आरती होते.