Smriti Mandhana Wedding : …तोपर्यंत लग्न होणार नाहीच, स्मृती मानधना निर्णयावर ठाम, लग्नासाठी ऑल सेट पण असं झालं काय?

स्मृती मानधना हिचे वडील श्रीनिवास मानधना यांना हृदयविकाराचा झटका आला. यानंतर त्यांना तातडीने सांगलीत उपचारांसाठी रूग्णालयात दाखल करण्यात आले. श्रीनिवास मानधना हे सध्या डॉक्टरांच्या विशेष देखरेखीखाली आहेत आणि त्यांना पुढील काही दिवस रुग्णालयातच राहण्याचा सल्ला देण्यात आला आहे. स्मृती मानधना तिच्या वडिलांच्या खूप जवळ आहे, हे सर्वज्ञात आहे. त्यांच्या या घनिष्ठ संबंधामुळेच, वडिलांची प्रकृती पूर्णपणे ठीक होत नाही, तोपर्यंत विवाह सोहळा न करण्याचा निर्णय तिने स्वतः घेतला आहे. हा संपूर्ण प्रकार मानधना कुटुंबासाठी अनपेक्षित आणि धक्कादायक आहे. कुटुंबातील सर्व सदस्य श्रीनिवास मानधना यांच्या लवकरात लवकर बरे होण्याची अपेक्षा करत आहेत आणि त्यासाठी प्रार्थनाही करत आहेत. स्मृतीसाठी सध्या तिच्या वडिलांचे आरोग्य हीच सर्वात मोठी प्राथमिकता आहे आणि त्यामुळेच तिने हा अत्यंत महत्त्वाचा आणि भावनिक निर्णय घेतला आहे.

या घडामोडीबाबत माहिती देताना तोहीन मिश्रा यांनी सांगितले की, “स्मृती वडिलांच्या प्रकृतीबाबत खूप स्पष्ट आहे. तिचे वडील पूर्णपणे बरे झाल्यानंतरच विवाह सोहळ्याबाबत पुढील निर्णय घेतला जाईल. सध्या विवाह अनिश्चित काळासाठी पुढे ढकलण्यात आला आहे.” त्यांनी उपस्थित माध्यमांना आणि जनतेला नम्र विनंती केली आहे की, या कठीण काळात मानधना कुटुंबाच्या गोपनीयतेचा आदर करावा.