राहुल नार्वेकरांच्या कामकाजावर सर्वपक्षीय सदस्यांकडून नाराजी व्यक्त?

महाराष्ट्र विधानसभा अध्यक्ष राहुल नार्वेकर यांच्या कामकाजावर सर्वपक्षीय सदस्यांकडून नाराजी व्यक्त करण्यात आली आहे. सूत्रांनी दिलेल्या माहितीनुसार, १० फेब्रुवारी रोजी झालेल्या कामकाज सल्लागार समितीच्या बैठकीत ही नाराजी समोर आली. यामध्ये मुख्यमंत्री आणि वरिष्ठ मंत्र्यांनीही अध्यक्षांच्या कामकाजाबाबत असंतोष व्यक्त केला. सभागृहात येणाऱ्या असंख्य लक्षवेधी सूचना आणि ठराविक सदस्यांचे गैरवर्तन या प्रमुख कारणांवरून नाराजी नोंदवण्यात आली. विरोधी पक्षांनी आणि सत्ताधारी पक्षातील काही मंत्र्यांनीही अध्यक्षांकडून सभागृह चालवण्याच्या पद्धतीवर प्रश्नचिन्ह उपस्थित केले आहे. आजपासून सुरू होणाऱ्या अर्थसंकल्पीय अधिवेशनामध्ये सभागृह नियमांनुसार चालावे अशी विरोधकांची मागणी आहे. या घडामोडींमुळे आगामी अधिवेशन काळात सभागृहाचे कामकाज अधिक नियमानुसार चालण्याची अपेक्षा व्यक्त होत आहे.