सुनेत्रा पवार प्रीतीसंगमावर यशवंतराव चव्हाणांच्या स्मृतिस्थळावर पोहोचल्या

उपमुख्यमंत्री सुनेत्रा पवार यांनी नुकताच आपला पहिला सातारा जिल्ह्याचा दौरा केला. या दौऱ्यादरम्यान, त्यांनी कराड येथील प्रीतिसंगमावर महाराष्ट्राचे पहिले मुख्यमंत्री यशवंतराव चव्हाण यांच्या समाधीस्थळी जाऊन आदरांजली वाहिली. त्यांच्यासोबत राष्ट्रवादी पक्षाचे महत्त्वाचे नेते सुनील तटकरे, महिला आयोगाच्या रुपाली चाकणकर, मंत्री मकरंद पाटील आणि राष्ट्रवादीच्या पुण्यातील नेत्या रुपाली पाटील ठोंबरे उपस्थित होत्या.

यशवंतराव चव्हाणांना अभिवादन केल्यानंतर, सुनेत्रा पवार यांनी कराडमध्येच अजित पवार यांचे दिवंगत सुरक्षारक्षक विदिप जाधव यांच्या कुटुंबीयांची भेट घेतली. विमान अपघातात विदिप जाधव यांचे दुःखद निधन झाले होते. या पार्श्वभूमीवर, पवार यांनी जाधव कुटुंबीयांना सांत्वनपर भेट देऊन त्यांचे दुःख वाटून घेतले. यावेळी शासकीय विश्रामगृहामध्ये त्यांनी जिल्हाधिकारी आणि पोलीस अधीक्षकांसह प्रशासकीय अधिकाऱ्यांशीही संवाद साधला. या दौऱ्यासाठी मोठ्या संख्येने कार्यकर्ते जमले होते आणि कडेकोट पोलीस बंदोबस्त ठेवण्यात आला होता. उपमुख्यमंत्री म्हणून शपथ घेतल्यानंतर सुनेत्रा पवार यांचा हा पहिलाच सातारा दौरा होता.