Kalyan Crime : चांदीला सोन्याचं पाणी अन् बनावट हॉलमार्क तर दुसरीकडे अश्लील चाळे… दोन घटनांनी कल्याण हादरले

कल्याण शहरात नुकत्याच दोन मोठ्या गुन्हेगारी घटना उघडकीस आल्या असून, पोलिसांनी तातडीने कारवाई करत आरोपींना ताब्यात घेतले आहे. यामध्ये बनावट हॉलमार्क वापरून सराफांची फसवणूक केल्याचा प्रकार आणि एका बारमध्ये अश्लील कृत्ये सुरू असल्याचा प्रकार समोर आला आहे.

पहिल्या घटनेत, कल्याणमध्ये बनावट बीआयएस हॉलमार्कचा वापर करून सराफांची फसवणूक केल्याचे उघड झाले. आरोपी चांदीवर सोन्याचे पाणी लावून त्याला बनावट हॉलमार्क लावत होते. या प्रकरणी दोन सराफांची फसवणूक झाल्यानंतर पोलिसांनी तपास सुरू केला. तिसऱ्या प्रयत्नादरम्यान, पोलिसांनी मुख्य आरोपीला अटक केली आहे. तसेच, पुण्यातून बनावट हॉलमार्क पुरवणाऱ्या व्यक्तीलाही पोलिसांनी ताब्यात घेतले आहे.

दुसरी घटना कल्याणमधील अमर पॅलेस या बारशी संबंधित आहे. मध्यरात्री पोलिसांनी या बारवर छापा टाकला. महिला वेटरकडून ग्राहकांसोबत अश्लील चाळे सुरू असल्याचा धक्कादायक प्रकार समोर आला. या प्रकरणी बार चालक आणि व्यवस्थापकासह एकूण चार जणांना पोलिसांनी ताब्यात घेतले आहे. त्यांच्याविरोधात गुन्हा दाखल करण्यात आला असून, पुढील तपास सध्या सुरू आहे. कल्याण पोलिसांनी केलेल्या या कारवाईमुळे शहरातील गुन्हेगारीला आळा घालण्याचा प्रयत्न केला जात आहे.