Yavatmal : ना जास्त मतं, ना कमी, ईश्वरचिठ्ठीने ठरला विजय; यवतमाळमध्ये मविआच्या उमेदवाराचा विजय

यवतमाळ जिल्हा बँक निवडणुकीच्या निकालाने सर्वांचे लक्ष वेधले आहे. उमरखेड गटामध्ये महाविकास आघाडीच्या उमेदवाराने ईश्वरचिठ्ठीने रोमांचक विजय मिळवला आहे. यवतमाळमधील राजकीय वर्तुळात ही बातमी चर्चेचा विषय बनली आहे.

उमरखेड गटातून महाविकास आघाडीचे उमेदवार राम देवसरकर आणि माजी आमदार प्रकाश देवसरकर यांच्यात थेट लढत होती. अत्यंत चुरशीच्या या निवडणुकीत दोघांनाही समान मते मिळाल्याने निकाल अनिश्चित बनला होता. मतमोजणी पूर्ण झाल्यानंतर राम देवसरकर आणि प्रकाश देवसरकर या दोन्ही उमेदवारांना प्रत्येकी 25 समसमान मते मिळाली. त्यामुळे नियमानुसार, विजयी उमेदवार निश्चित करण्यासाठी ईश्वरचिठ्ठीचा आधार घेण्यात आला.

ईश्वरचिठ्ठी काढल्यानंतर, महाविकास आघाडीचे उमेदवार राम देवसरकर यांच्या नावाची चिठ्ठी निघाली आणि त्यांना विजयी घोषित करण्यात आले. या नाट्यमय विजयामुळे महाविकास आघाडीच्या गोटात उत्साहाचे वातावरण आहे. यवतमाळ जिल्हा बँकेच्या निवडणुकीत ईश्वरचिठ्ठीने झालेला हा विजय महाविकास आघाडीसाठी महत्त्वाचा मानला जात आहे.