Insurance : मोफत मिळते लाखोंची विमा सुरक्षा! मग तुम्हाला मिळाला का फायदा ?

नवी दिल्ली : भविष्यातील जोखीमेसाठी आणि आपल्या पश्चात कुटुंबियांच्या आर्थिक सुरक्षेसाठी आपण जीवन विमा (Life Insurance) खरेदी करतो. तसेच आता आरोग्य (Health), ट्रॅव्हल विमा घेण्याकडेही लोकांचा कल वाढला आहे. पण त्यासाठी तु्म्हाला दरमहा, तिमाही, सहामाही, वार्षिक प्रीमिअम द्यावा लागतो. पण तुम्हाला मोफत विमा (Free Insurance Coverage) मिळतो, याची माहिती आहे का?

केंद्रीय भविष्य निर्वाह निधी संघटनेच्या (EPFO) सदस्यांना केंद्र सरकार हे विमा संरक्षण देते. नोकरदार वर्गाचे पीएफ खाते असते. त्यांना मोफत विमा मिळतो. इंप्लॉइज डिपॉजिट लिंक्ड इंश्योरेंस स्कीम 1976 (EDLI) अंतर्गत हा विमा मिळतो.

अगदी अल्प शुल्कात हा विमा EDLI अंतर्गत देण्यात येतो. या योजनेतंर्गत सदस्याच्या वारसाला 2.5 लाख ते 7 लाख रुपयापर्यंतचे विमा संरक्षण मिळते. या योजनेतंर्गत जास्तीत जास्त 7 लाख रुपयांचे विमा संरक्षण मिळते.

एका वर्षातच एक किंवा दोन कंपन्यांमध्ये काम करणाऱ्या आणि ज्यांचे पीएफ खाते आहे, अशा कर्मचाऱ्यांच्या कुटुंबियांना या योजनेचा फायदा मिळतो. वारसदाराला योजनेतंर्गत विम्यासाठी दावा दाखल करता येतो.

सरकारी आणि खासगी क्षेत्रातील सर्वच बँक त्यांच्या डेबिट कार्डवर विमा संरक्षण देतात. यामध्ये वेगवेगळ्या प्रकारचे विमा संरक्षण मिळते. यामध्ये वैयक्तिक अपघात संरक्षण, खरेदी सुरक्षा, कायमचे अपंगत्व यावर विमा संरक्षण देण्यात येते. यावर 10 लाखांपर्यंतचे विमा सुरक्षा देण्यात येते.

क्रेडिट कार्ड धारकालाही या विम्याचा लाभ मिळतो. त्यांना अपघात विमा, प्रवास विमा, क्रेडिट विमा आणि खरेदी विम्यावर संरक्षण मिळते. विविध बँकेच्या क्रेडिट कार्डवर बँकेच्या धोरणानुसार इन्शुरन्स कव्हरेजची रक्कम बदलते.

अनेकदा म्युच्युअल फंडात गुंतवणूक करणाऱ्या गुंतवणूकदारांना ही गोष्ट माहितीच नसते की, त्यांच्या गुंतवणुकीवरही विमा संरक्षण मिळते. अनेक फंड हाऊस ही सुविधा पुरवितात. एसआईपी सह विमा उत्पादन (SIP plus Insurance products) असे या योजनेचे नाव आहे.

ICICI Prudential Mutual Fund चा SIP Plus, Aditya Birla Sun Life Mutual Fund चा Century Fund तर इतरही अनेक फंड हाऊस अशा प्रकारचे विमा संरक्षण देते. यामध्ये कमाल 50 लाख रुपयांपर्यंतचे विमा संरक्षण मिळते.