Share Market | अरे हा शेअर आहे की परीस! दहा वर्षांत 10 हजारांचे केले 16 लाख
Share Market | रिफेक्स इंडस्ट्रीजच्या शेअरने कमाल दाखवली. गुंतवणूकदारांना दहा वर्षांत छप्परफाड परतावा दिला. या शेअरमध्ये दहा वर्षांत 16,000% तेजी दिसली. ज्यांनी सुरुवातीला 10,000 रुपये गुंतवले. त्यांच्या गुंतवणुकीचे मूल्य आता 16 लाख रुपये झाले. या शेअरने गुंतवणूकदारांना मालामाल केले.
नवी दिल्ली | 4 February 2024 : रिफेक्स इंडस्ट्रीजच्या शेअरने गेल्या 10 वर्षांत 16,000% रिटर्न दिला. जर एखाद्या गुंतवणूकदाराने 10 वर्षांपूर्वी या कंपनीत 10,000 रुपयांची गुंतवणूक केली असती, तर आज त्याचे मूल्य जवळपास 16 लाख रुपये असते. ही कंपनी रेफ्रिजरेंट गॅस आणि रिफील करण्याचे काम करते. गेल्या एका महिन्यात या कंपनीच्या शेअरमध्ये 9 टक्क्यांची तेजी आली. तर तीन महिन्यात हा शेअर 29 टक्के वधारला. या कंपनीत 53.37 टक्के शेअर प्रमोटर्सकडे आणि 46.73 टक्के वाटा शेअर धारकांकडे आहे. यामध्ये एकही म्युच्युअल फंड्स अथवा परदेशी गुंतवणूकदार नाही. कंपनीत 29% वाटा सर्वसामान्य गुंतवणूकदारांकडे आहे.
किती महसूल, फायदा किती
सप्टेंबरच्या तिमाही आकड्यांनुसार, कंपनीला ऑपरेशन्समधून तिमाही आधारावरील महसूलात 8 टक्क्यांची घसरण झाली. हा महसूल 352 कोटी रुपये होता तर नफ्यात किंचित वाढ होऊन तो 21.43 कोटी रुपयांवर पोहचला. विश्लेषकांच्या मते, बेंचमार्क इंडेक्सपेक्षा हा शेअर चांगली कामगिरी दाखवेल. टेक्निकल चार्टमध्ये पण तो उजवा ठरला आहे. आठवड्याच्या कसोटीवर त्याची कामगिरी जोरदार आहे. तज्ज्ञांच्या मते 644 रुपयांचा स्टॉप लॉससह 760 ते 800 रुपयांपर्यंत हा स्टॉक उसळी घेईल.
अशी बजावली कामगिरी
सध्या हा स्टॉक 620 रुपयांच्या सरासरी गतिशील स्तरापेक्षा अधिक व्यापार करत आहे. हा शेअर 750 रुपयांपर्यंत मजल मारु शकतो. अथवा त्यापेक्षा पण उसळी घेऊ शकतो. काही तज्ज्ञांच्या मते, येत्या तिमाहीपर्यंत हा शेअर 1000 रुपयांच्या घरात जाईल. शुक्रवारी कंपनीचा शेअर 0.23% घसरणीसह बीएसईवर 680.20 रुपयांवर बंद झाला. 52 आठवड्यातील उच्चांकी किंमत 923.95 रुपये होती. तर 52 आठवड्यातील निच्चांकी किंमत 221.30 रुपये आहे. गेल्या वर्षी 28 मार्च रोजी रिफेक्स इंडस्ट्रीजचा शेअर या निच्चांकावर होता. या शेअरने अनेकांना मालामाल केले.
सूचना : हा शेअरचा केवळ लेखाजोखा आहे. या शेअरची कामगिरी आहे. गुंतवणूक करण्यापूर्वी तुम्ही प्रमाणित गुंतवणूक सल्लागाराकडून सल्ला आवश्य घ्या. तुमचा कोणत्या ही प्रकारचा फायदा अथवा नुकसानीला TV9 मराठी जबाबदार नसेल. पेनी शेअरमध्ये गुंतवणूक करताना जागरुक राहा. कंपनीचे फंडामेंटल तपासा. भूलथापांना अजिबात बळी पडू नका.
