सक्षमचा छोटा भाऊ… मृतदेहासोबत लग्न करणाऱ्या आंचलचा धक्कादायक खुलासा, सासर का सोडलं?

सहा महिन्यांपूर्वी नांदेड येथील एक प्रकरण चांगलेच गाजले होते. या प्रकरणात सक्षम ताटे याची प्रेयसीच्या भावांनी आणि वडिलांनी मिळून निर्घृण हत्या केली. त्यानंतर सक्षमची प्रेयसी आंचलने या प्रकरणी पोलिसात तक्रार दाखल केली. तसचे आंचलने सक्षमच्या मृतदेहाशी लग्न करुन आयुष्यभर त्याच्या घरी राहणार असल्याचे सांगितले. मात्र, आता आंचल घर सोडून गेली असल्याचे म्हटले जात आहे. या सर्व चर्चांनंतर आंचल मामिडवारने प्रतिक्रिया दिली आहे.

लहान भावाबाबत धक्कादायक खुलासा

आंचल मामिडवारने नुकताच एक वृत्तवाहिनीला मुलाखत दिली. या मुलाखतीमध्ये तिने थेट घर का सोडलं याबाबत सांगितलं आहे. सक्षमची आई संगीता ताटे यांनी हा आरोप केला होता की आंचलने आजीकडे जायचा बहाणा करून घर सोडले. त्यावर बोलताना आंचल म्हणाली की, सक्षमचा लहान भाऊ आपल्याशी गैरवर्तन करत होता, म्हणून सगळ्यांना सांगून घर सोडले आहे. आंचलच्या या वक्तव्याने सर्वत्र खळबळ माजली आहे.

काय म्हणाली आंचल?

सक्षमचा लहान भाऊ आपल्याशी गैरवर्तन करत असल्याने आपण घर सोडण्याचा निर्णय घेतल्याचा गंभीर आरोप आंचलने केला आहे. ही बाब मी सक्षमच्या कुटुंबीयांना देखील सांगितली. मात्र त्यांनी विश्वास ठेवला नाही. पुढे काही चुकीचे घडले तरी सक्षमचे कुटुंबीय विश्वास ठेवणार नाहीतय म्हणून मी सर्वांना सांगून, पोलिसांना कल्पना देऊन घर सोडले. पोलीस कर्मचाऱ्यांनी स्वतः सोबत येऊन मला माझ्या वडिलांच्या घरी सोडले. सध्या मी वडिलांच्या घरी राहत असल्याचे आंचलने यावेळी सांगितले.

ट्रोलर्सला देखील सडेतोड उत्तर

आंचलने सक्षमचे घर सोडल्याच्या बातम्या सोशल मीडियावर प्रचंड पसरल्या आहेत. त्यावरुन आंचलला ट्रोल केले जात आहे. याबाबत बोलताना तिने नाराजी व्यक्त केली आहे. सत्य परिस्थिती जाणून घेतल्याशिवाय कोणावरही आरोप करू नये असे आंचल थेट म्हणाली आहे.