बहुचर्चित एटीएम कॅश व्हॅन लूट प्रकरण, अखेर 10 वर्षांनी बंद फाईल ओपन झाली अन्…
दहा वर्षापूर्वी ते दोघे एटीएम कॅश व्हॅन लुटून फरार झाला. पोलिसांना कोणताही सुगावा न लागल्याने त्यांनी ही केस बंद केली. पण म्हणतात ना गुन्हा कधी लपत नाही.
मुंबई : बहुचर्चित एटीएम कॅश व्हॅन दरोडा प्रकरणातील आरोपींना अटक करण्यात पोलिसांना अखेर यश आले आहे. मुंबईतील कांदिवली पोलिसांनी 10 वर्षांनी आरोपींना अटक केली आहे. नोटांनी भरलेल्या एटीएम कॅश व्हॅनवरील दरोडा हा 2012 मधील सर्वात मोठा दरोडा होता. एटीएम कॅश व्हॅनमधून सुमारे 80 लाख रुपये लुटून ते पळून गेले होते. सध्या कांदिवली पोलिसांनी दोन्ही आरोपींना अटक केली असून, त्यांनी लुटलेली रक्कम कोठे ठेवली होती, त्यांच्यासोबत आणखी किती जणांचा सहभाग होता, हा दरोड्याचा प्रकार याआधी किंवा नंतर झाला आहे का? याबाबत पोलीस तपास सुरू आहे. अरुण सहदेव वाघमारे आणि सतीश संभाजी आगडे अशी अटक आरोपींची नावे आहेत.
दहा वर्षानंतर आरोपी अटक
दोन्ही आरोपी हे एटीएम कॅश व्हॅनवर चालक म्हणून कार्यरत होते. दहा वर्षांपूर्वी 2012 मध्ये एटीएम कॅश व्हॅनमधून सुमारे 80 लाख रुपये लुटून आरोपी पळून गेले होते. कोणताही सुगावा न लागल्याने 10 वर्षांपूर्वी हे प्रकरण बंद करण्यात आले होते. मात्र कांदिवली पोलिसांच्या सतर्कतेमुळे दरोडेखोरांची माहिती मिळाली आणि पोलिसांनी 10 वर्षांनंतर त्यांना अटक केली.
दोघेही एटीएम कॅश व्हॅनवर चालक होते
अरुण सहदेव वाघमारे याला सांगली विश्रामबाग येथून अटक करण्यात आली आहे, तर दुसरा आरोपी सतीश संभाजी आगडे याला लातूरच्या साई गावातून पोलिसांनी अटक केली आहे. हे दोन्ही आरोपी मुंबईतील दहिसर पश्चिम कांदरपाडा येथे राहत होते. हे दोन्ही आरोपी एटीएम कॅश व्हॅन डिपॉझिट व्हॅनमध्ये चालक म्हणून काम करायचे. दोन्ही आरोपींनी 2012 मध्ये कॅश व्हॅन लुटली आणि व्हॅन कांदिवली पश्चिम एमजी रोड येथे सोडून पळ काढला होता.
