Dombivli Crime : प्रमोशन होत नसल्याच्या रागातून शिक्षिकेच्या पतीचा मुख्याध्यापकावर प्राणघातक हल्ला, रेल्वे ट्रॅकवर थेट..
डोंबिवली शहरातून एक धक्कादायक घटना समोर आली आहे. शिक्षिकेच्या पतीने तिच्या शाळेच्या मुख्याध्यापकावर प्राणघातक हल्ला केल्याची खळबळजनक घटना शहरात घडली आहे. यामध्ये संबंधित मुख्याध्यापक जबर जखमी झाले. डोंबिवली ते खारबाव रेल्वे स्थानकादरम्यानच्या रेल्वे ट्रॅकवर हा हल्ला झाला.
डोंबिवली शहरातून एक धक्कादायक घटना समोर आली आहे. शिक्षिकेच्या पतीने तिच्या शाळेच्या मुख्याध्यापकावर प्राणघातक हल्ला केल्याची खळबळजनक घटना शहरात घडली आहे. यामध्ये संबंधित मुख्याध्यापक जबर जखमी झाले. डोंबिवली ते खारबाव रेल्वे स्थानकादरम्यानच्या रेल्वे ट्रॅकवर हा हल्ला झाला. याप्रकरणी हल्लेखोर पतीला पोलिसांनी अटक केली आहे.
भागवत गुरव ( वय 56) हे या हल्ल्यात गंभीर जखमी झाले असून त्यांच्यावर रुग्णालयात उपचार सुरू आहेत . त्यांनी नोंदवलेल्या तक्रारीनंतर डोंबिवली लोहमार्ग पोलिसांनी गुन्हा दाखल करून आरोपी शकील शेख याला अटक केली आहे. याप्रकरणी पोलिस अधिक तपास करत आहेत.
का केला प्राणघातक हल्ला ?
पोलिसांकडून मिळालेल्या माहितीनुसार, आरोपी शकील शेख यांची प्तनी डोंबिवलीतील एका शाळेत शिक्षक असून भागवत गुरव हे तेथील मुख्याध्यापक आहे. मात्र शेख यांच्या पत्नीचे प्रमोशन आणि पगारवाढ रोखली गेली आहे. मुख्याध्यापकांनी खातेपुस्तक रोखून धरल्यानेच आपले प्रमोशन होत नसल्याचे त्या शिक्षिकेचे म्हणणे होते. आपल्या पत्नीची पगारवाढ रोखून त्रास देत असल्याच्या रागातून शेख यांना आला आणि त्याच रागातून त्यांनी हा हल्ला केला असे समजते.
घटनेच्या दिवशी, सोमवारी दुपारी मुख्याध्यापक गुरव हे डोंबिवलीकडून रेल्वे ट्रॅकमधून चालत खारबावच्या दिशेने जात होते. तेव्हा मागून आलेल्या शकील याने गुरव यांच्या छातीवर, मानेवर , गळ्यावर तीक्ष्ण हत्याराने वार करत प्राणघातक हल्ला केला. त्यामध्ये गुरव हे गंभीर जखमी झाले. ही घटना समजताच एकच खळबळ उडाली.
जखमी मुख्याध्यापक भागवत गुरव यांच्यावर खाजगी रुग्णालयात उपचार सुरू आहेत. तर शकील शेख या आरोपीला डोंबिवली रेल्वे पोलिसांनी बेड्या ठोकल्या आहेत. डोंबिवली लोहमार्ग पोलिसांनी त्याच्याविरोधात खुनाचा प्रयत्न करणे, धमकावणे अशा विविध कलमानुसार गुन्हा दाखल केला आहे. याप्रकरणी अधिक तपास देखील करण्यात येत आहे