गुंगीचे औषध पाजून विवाहितेवर अत्याचार, अश्लील व्हिडिओ व्हायरल करण्याची धमकी, पीडितेकडे 10 लाखांची मागणी

कोल्हापूर : गुंगीचे औषध पाजून विवाहितेवर अत्याचार करण्यात आल्याची घटना समोर आली आहे. त्यानंतर अश्लील फोटो आणि व्हिडिओ व्हायरल करण्याची धमकी देत आरोपींनी पीडितेकडे 10 लाख रुपयांच्या खंडणीची मागणी केल्याचाही आरोप आहे. कोल्हापूर जिल्ह्यातील शाहूपुरी परिसरात हा धक्कादायक प्रकार घडला.

नेमकं काय घडलं?

शाहूपुरी पोलिसांनी दोघा संशयितांना अटक केली आहे, तर एका संशयिताच्या पत्नीवर देखील शाहूपुरी पोलिस ठाण्यात गुन्हा दाखल करण्यात आला आहे. इमरान बागवान आणि आरिफ शेख अशी संशयित आरोपींची नावं आहे. पिण्याच्या पाण्यातून गुंगीचे औषध देत विवाहितेवर अत्याचार केल्याची प्राथमिक माहिती आहे. त्यानंतर तिचे अश्लील फोटो आणि व्हिडिओ व्हायरल करण्याची धमकी देत आरोपींनी पीडितेकडे 10 लाख रुपयांच्या खंडणीची मागणी केल्याचाही दावा केला जात आहे.

भंडाऱ्यात अल्पवयीन मुलींवर अत्याचार

दरम्यान, शिवलेले कपडे आणायला जात असलेल्या दोन 11 वर्षीय अल्पवयीन मुलींवर अत्याचार झाल्याची घटना नुकतीच समोर आली होती. 55 वर्षीय वासनांध इसमाने दोघींना जबरदस्ती घरी ओढत नेत त्यांच्यावर अत्याचार केल्याचा आरोप आहे. ही घटना भंडारा जिल्ह्याच्या लाखांदूर तालुक्यातील ओपारा येथे घडली होती.

घटनेच्या दिवशी दुपारच्या सुमारास अकरा वर्षांच्या दोघी अल्पवयीन मुली शिलाई केलेले सलवार आणि अन्य कपडे आणण्यासाठी गावातीलच एका घरी जात होत्या. यावेळी आरोपीने दोन्ही अल्पवयीन मुलींना स्वतःच्या घरी जबरदस्ती खेचून नेले. त्यानंतर मारहाण करत दोन्ही अल्पवयीन मुलींवर अत्याचार केले.

अल्पवयीन मुलींच्या ओरडण्याचे आवाज येताच शेजाऱ्यांनी आरोपीच्या घरातील खिडकीतून डोकावून पाहिलं असता हा प्रकार उघड झाला. या घटनेची माहिती पीडित अल्पवयीन मुलींच्या पालकांना होताच त्यांनी तात्काळ लाखांदूर पोलिस ठाणे गाठून आरोपीविरोधात तक्रार दाखल केली.

संबंधित बातम्या :

11 वर्षांच्या दोघी मुलींवर अत्याचार, भंडाऱ्यात 55 वर्षीय आरोपीला अटक

दारुड्या काकाचा सात वर्षांच्या पुतणीवर लैंगिक अत्याचाराचा प्रयत्न, स्थानिकांकडून चोप