Mumbai Crime : ऑनलाईन ऑर्डर करताय? मग आधी हे वाचा, अन्यथा तुमच्यासोबतही होऊ शकते असे !

मुंबई / 25 जुलै 2023 : हल्ली ऑनलाईन फसवणुकीच्या घटना मोठ्या प्रमाणावर उघडकीस येत आहेत. यामुळे ऑनलाईन खरेदी करणे अनेकांना महागात पडत आहे. मुलुंडमध्ये अशीच एक घटना उघडकीस आली आहे. फेसबुकवरील एका ग्रुपद्वारे सुका मेवा खरेदी करणे एका 38 वर्षीय महिलेला चांगलेच महागात पडले आहे. ऑनलाईन खरेदीच्या नावाखाली महिलेला तब्बल 6.93 लाख रुपयांचा गंडा घातला आहे. आपली फसवणूक झाल्याचे लक्षात येताच महिलेने मुलुंड पोलीस ठाण्यात धाव घेत तक्रार दाखल केली. मुलुंड पोलिसांनी फसवणुकीची तक्रार दाखल करत पुढील तपास सुरु केला आहे.

काय आहे प्रकरण?

मुलुंडमधील वीणा नगर येथील रहिवासी असलेल्या महिलेला 20 जुलै रोजी “मुलुंड बाय सेल ग्रुप” या फेसबुक ग्रुपवर 40% सवलतीत सुक्या मेव्याची जाहिरात करणारी पोस्ट आली. महिलेने जाहिरातीत दिलेल्या व्हॉट्सअप नंबरवर संपर्क साधला. यावेळी तिला 1,140 रुपयात सुका मेवा खरेदी करण्याची ऑफर देण्यात आली. तिने तात्काळ विक्रेत्यांनी दिलेल्या क्विक रिस्पॉन्स (QR) कोडवर पेमेंट केले. त्यानंतर महिलेला दोन दिवसात ऑर्डर घरपोच मिळेल असे सांगण्यात आले.

काय आहे मोडस ऑपरेंडी?

दोन दिवसांनी ऑर्डर न मिळाल्याने महिलेने तसे कळवले. यावेळी तिच्या आदेशाची पुष्टी झाली नसल्याचे महिलेला कळवण्यात आले. यानंतर महिलेने दिलेले पैसे परत मागितले. यावेळी आरोपींनी तिला क्यूआर कोड पाठवा लगेच पैसे परत येतील असे सांगितले. त्यानंतर त्यांनी चुकून तिला 10,000 रुपये अतिरिक्त पाठवल्याचा दावा केला आणि ते परत करण्यास सांगण्यात आले. त्यांनी तिला 100 रुपये पाठवून तिचा विश्वास संपादन केला. मग पुन्हा चुकून 49,000 रुपये आणि 38,450 रुपये परत पाठवल्याचा दावा केला. महिलेने सर्व पैसे परत केले. यानंतर तिच्या बँक खात्यातून एकूण 6,93,500 रुपये गेल्याचे तिला कळले, परंतु कोणतीही रक्कम जमा झाली नव्हती.

याप्रकरणी मुलुंड पोलिसांनी तपास सुरू केला असून, ज्या बँक खात्यांमध्ये पैसे पाठवले गेले त्यांचा शोध घेत आहेत. पीडितेने तिची बँक स्टेटमेंट्स सादर करत आरोपींशी केलेले सर्व व्यवहार हायलाइट केले आहेत.