वसई किनाऱ्यावर सुटकेसमधून दुर्गंध, उघडून पाहिलं तर धडापासून वेगळा असलेला महिलेचा मृतदेह
वसईच्या भुईगाव समुद्रकिनारी एका सुटकेसमध्ये अनोळखी महिलेचा मृतदेह आढळला आहे.
पालघर : वसईच्या भुईगाव समुद्रकिनारी एका सुटकेसमध्ये अनोळखी महिलेचा मृतदेह आढळला आहे. या महिलेची हत्या करुन, मुंडक धडापासून वेगळं करून तो मृतदेह सुटकेसमध्ये भरुन समुद्रात फेकलेला असावा, असा अंदाज वर्तविण्यात येत आहे. वसईच्या भुईगाव समुद्र किनारी आज दुपारी हा मृतदेह मिळाला आहे. सुटकेसमध्ये मृतदेह कुजलेल्या स्थितीत असून मृतदेहाच्या अंगात ड्रेस घातलेला आहे.
नेमकं प्रकरण काय?
भुईगाव समुद्रकिनारी लाटांसोबत एक सुटकेस किनाऱ्यावर धडकली. या सुटकेसमधून दुर्गंध येत होता. त्यामुळे का काहीतरी विचित्र प्रकार असल्याचा संशय स्थानिकांना आला. यावेळी तेथील स्थानिक पोलीस कर्मचाऱ्याच्या निदर्शनास ही बाब आली. त्यांनी तातडीने या सुटकेस विषयीची माहिती पोलीस ठाण्यात दिली.
सुटकेस उघडल्यानंतर पोलीसही चक्रावले
सुटकेसची माहिती मिळाल्यानंतर पोलीस तातडीने घटनास्थळी दाखल झाले. सुटकेसमधून खरंच प्रचंड दुर्गंध येत होता, हे त्यांच्या निदर्शनास आलं. त्यांनी ती सुटकेस ताब्यात घेऊन उघडली असता त्यामध्ये महिलेचा मुंडकी नसलेला मृतदेह आढळला. सुटकेसमधील मृतदेह बघून पोलीसही हादरले. पोलिसांनी तातडीने वेळेचा विलंब न करता तो मृतदेह जेजे रुग्णालयात शवविच्छेदनासाठी पाठवला.
अज्ञात आरोपी विरोधात गुन्हा दाखल
पोलिसांच्या अंदाजानुसार, संबंधित मृतदेह हा समुद्रात भरती आली असताना टाकण्यात आला असावा. त्यानंतर आता ओहटी असल्याने मृतदेहाची सुटकेस किनाऱ्यावर आली असल्याचा अंदाज वर्तवण्यात आला आहे. मृतदेहाची ओळख पटवणं अवघड आहे. पण पोलीस त्यांच्या स्तरावर या प्रकरणाचा उलगडा करण्याचा सर्वोतोपरी प्रयत्न करत आहेत. पोलिसांनी याप्रकरणी अज्ञात आरोपी विरोधात हत्येचा गुन्हा दाखल केला आहे. तसेच तपासासाठी स्वतंत्र 4 पथक तयार करण्यात आली आहेत.
याआधी दोन मृतदेह आढळले
एकाच महिन्यात तीन मृतदेह वसई पोलीस ठाणे हद्दीत सापडले आहेत. दोन मृतदेह हे वसई पाचूबंदर समुद्र किनाऱ्यावर तर आज एक मृतदेह भुईगाव समुद्र किनाऱ्यावर सापडला आहे. 15 जुलैला अनोळखी पुरुषाचा मृतदेह किल्लाबंदरला सापडला होता. त्याआधी 12 जुलैला ममता पटेल या बेपत्ता असणाऱ्या महिलेचा किल्ला बंदर येथे मृतदेह सापडला होता. ममता पटेल या मॉर्निंग वॉकसाठी गेल्या होत्या आणि त्या बेपत्ता झाल्या होत्या. दुसऱ्या दिवशी त्यांचा मृतदेह सापडला होता.
संबंधित बातम्या :
हुंड्यासाठी विवाहितेचा छळ, प्रचंड मारहाण, प्रायव्हेट पार्टमध्ये मिरची पूड टाकण्याचा प्रयत्न
