मोठी बातमी ! नितीन गडकरी यांना धमकी प्रकरणात लष्कर ए तोयबाच्या पाशाचा हात; चौकशीसाठी नागपूर पोलीस बेळगावकडे

नागपूर : नितीन गडकरी धमकी प्रकरणात धक्कादायक खुलासा झाला आहे. धमकी प्रकरणात लष्कर ए तोयबा आणि पॉप्युलर फ्रंट ऑफ इंडियाचा माजी सचिव अफसर पाशा याचाही समावेश असल्याचे तपासात निष्पन्न झाले आहे. दहशतवादी अफसर पाशाच्या अटकेसाठी नागपूर पोलीस बेळगावला रवाना झाले आहेत. पाशाला ताब्यात घेऊन पोलीस त्याची सखोल चौकशी करणार आहेत. जयेश पुजारीच्या चौकशीदरम्यान धक्कादायक माहिती पुढे समोर आली आहे. बेळगाव तुरुंगात अफसर पाशाची जयेश पुजारीसोबत ओळख झाल्याची माहिती मिळते.

जयेश पुजारीच्या चौकशीत धक्कादायक खुलासा

आरोपी जयेश पुजारी जेलमधून लष्कर ए तोएबा आणि पीएफआय या दहशतवादी संघटनांसाठी सदस्यांची नियुक्ती करायचा. जयेश पुजारीच्या चौकशीत ही धक्कादायक माहिती पुढे आली आहे. जयेश पुजारी हा कश्मीरी दहशतवादी अफसर पाशाच्या संपर्कात होता. पाशा हा ढाका आणि बंगळुरु येथील बॅाम्बस्फोट प्रकरणातील आरोपी आहे. पाशाने जयेश पुजारी याला बॅाम्ब बनवण्याचं प्रशिक्षण दिलं आणि त्याची पीएफआयमध्ये नियुक्ती केली. UAPA कायद्याअंतर्गत कारवाई करण्यात आली.

बेळगाव तुरुंगात जयेश पुजारी आणि अफसर पाशाची ओळख

केंद्रीय मंत्री नितीन गडकरी यांच्या कार्यालयात धमकीचे कॉल करणाऱ्या जयेश पुजारीचा माईंड वॉश करणाऱ्या दहशतवादी अफसर पाशाला नागपुरात आणणार आहे. नितीन गडकरी यांना फोन करून धमकी देण्यासाठी जयेश पुजारीला पाशाने प्रवृत्त केल्याची माहिती तपासात उघड झाली आहे. अफसर पाशा बेळगाव तुरुंगात असून, तुरुंगात पाशाचे जयेश पुजारीसोबत संबंध आले होते.