दहावी पासच्या सर्टिफिकेटला 60 हजार रुपये, पुणे पोलिसांनी सिनेस्टाईल मुसक्या आवळल्या

पुणे : दहावी-बारावीच्या परीक्षा या आपल्या आयुष्यातील टर्निंग पॉईंट असल्याचं मानलं जातं. शालेय शिक्षणाच्यावेळी प्रत्येक विद्यार्थी आपल्याला इंजिनियर व्हायचं किंवा डॉक्टर व्हायचं अशी वेगवेगळी स्वप्न पाहतात. त्यानुसार विद्यार्थी हे दहावी नंतर सायन्स, आर्ट्स आणि कॉमर्स अशा वेगवेगळ्या शाखांमधून 11 वी पासूनचं शिक्षण सुरु करतात. तर काहीजण वेगवेगळ्या क्षेत्राशी संबंधित डिप्लोमा कोर्स करुन आपल्या उपजिवेकेसाठी नोकरी शोधतात किंवा पुढचं शिक्षण घेतात. दहावी-बारावीपर्यंतचं शिक्षण सध्याच्या घडीला अनिवार्य आहे. कारण सरकारी नोकरी असेल किंवा इतर नोकरी असेल त्यासाठी कमीतकमी दहावीपर्यंतचं शिक्षणाची अट असते. पण पुण्यात एक वेगळाच प्रकार समोर आला आहे.

पुण्यात एका तरुणाला नोकरी मिळवायची होती. त्यासाठी तो वेगवेगळ्या ठिकाणी नोकरीचे अर्ज दाखल करत होता. अनेक ठिकाणी तो प्रयत्न करत होता. पण हा तरुण दहावी उत्तीर्ण नव्हता. त्यामुळे त्याला नोकरी मिळवण्यासाठी अडचणी येत होत्या. यावर पर्याय तो शोधत होता. या दरम्यान त्याला एकाने पत्ता दिला आणि संबंधित ठिकाणी बनावट प्रमाणपत्र बनवून मिळतं. या प्रमाणपत्रात दहावी किंवा बारावी उत्तीर्ण असल्याचा उल्लेख असतो. ते बनावट प्रमाणपत्र असलं तरी तुम्हाला नोकरी मिळेल, असं आश्वासन संबंधित तरुणाला देण्यात आलं.

तरुणाने आरोपींना 60 हजार दिले

तरुणाने फोन नंबर आणि पत्ता मिळवत संबंधित आरोपींशी संपर्क केला. आरोपींनी त्याला 60 हजार रुपयात आपण प्रमाणपत्र बनवून देतो असं सांगितलं. आपल्याला नोकरी मिळेल या आशेने या तरुणाने आरोपींना 60 हजार रुपये दिले. तरुणाला प्रमाणपत्र मिळालं. त्याने एका ठिकाणी नोकरीसाठी अर्ज केला. तिथे त्याने दहावी-बारावीचं प्रमाणपत्रही जमा केलं. पण इथेच तो फसला. त्याच्या कागदपत्रांची पडताळणी करताना तो अडकला. त्याच्यावर कायदेशीरपणे कारवाई करण्याचं ठरलं.

पोलिसांनी आरोपींना कसं हेरलं?

संबंधित प्रकरण पोलिसांपर्यंत गेलं. पुणे पोलिसांनी आधी तरुणाला ताब्यात घेतलं. त्याची चौकशी केली. या तरुणाकडून मिळालेल्या माहितीच्या आधारावर पोलिसांनी सापळा रचला आणि आरोपींना बेड्या ठोकल्या. या आरोपींचा जबाब नोंदवल्यानंतर आरोपींनी तरुणाकडून 60 हजार रुपये घेत बनावट प्रमाणपत्र दिल्याची धक्कादायक माहिती समोर आली.

पोलिसांनी या प्रकरणी चौघांना बेड्या ठोकल्या आहेत. यापैकी संदीप कांबळे हा मुख्य आरोपी असल्याची प्राथमिक माहिती समोर आली आहे. आरोपी हा दहावीच्या बोर्डाचे सर्टिफिकेट बरोबर मार्कशीट आणि स्कूल ट्रान्सफर सर्टिफिकेट देखील देत होता. आरोपी संदीपने अनेक लोकांना पैसे घेऊन फसविल्याचे पोलीस चौकशीत उघड झालंय. राज्यातील 35 तरुणांना फसवल्याचा पोलिसांना संशय आहे. पोलीस या प्रकरणी पुढील कारवाई करत आहेत.