अनैतिक संबंधात पोटचं लेकरूच ठरत होता अडथळा, आईसह प्रियकरांनं जे केलं त्याची तुम्ही कल्पनाच करू शकत नाही, काय घडलं?

सांगली : प्रेम करत असतांना अनेकदा काहींना नात्याचाही विसर पडतो. त्यामध्ये काही नाती जिवावर देखील उठतात. असाच एक धक्कादायक प्रकार सांगलीमधून समोर आला आहे. अनैतिक प्रेमसंबंधात अडथळा ठरणाऱ्या सहा वर्षाच्या चिमुकल्याचा प्रियकराच्या मदतीने खून केल्याचा खळबळजनक प्रकार सांगली जिल्ह्यातील खानापूर तालुक्यातील लेंगरे येथे उघडकीस आला आहे. सहा वर्षाच्या मुलाचे अपहरण झाल्याचा बनाव निर्दयी मातेने केल्याचेही समोर आले आहे. विहिरीत लहान मुलाचा मृतदेह तरंगताना आढळल्यानंतर विटा पोलिसांनी तपास सुरू केला होता. तपास करत असतांना धक्कादायक प्रकार उघडकीस आला आहे. प्रियकराच्या साथीने निर्दयी मातेने आपल्याच लेकरचा जीव घेतला आहे.

विटा पोलिसांनी प्रियकर आणि मृत मुलाची आई यांना दोघांना अटक केली असून त्यांच्यावर खुनाचा गुन्हा दाखल केला आहे. यामध्ये ज्योती लोंढे या विवाहितेचे आणि रूपेश घाडगे यांच्यात प्रेमसंबंध असल्याचे उघड झाले आहे.

दोघांचे गेल्या काही वर्षापासून अनैतिक प्रेमसंबंध आहेत. सहा वर्षांचा शौर्य हा प्रेमात अडथळा ठरत होता. दोघांना लग्न करायचे होते म्हणून त्याला दूर करायचे असल्याने त्यांनी अडथळा दूर करतांना त्याचा जीव घेतल्याचे समोर आले आहे.

खरंतर काही दिवसांपूर्वी संशयित आरोपी यांनी रात्रीच्या वेळेला मुलाला एका विहिरीत टाकून दिले होते. त्यानंतर मुलाचे अपहरण झाल्याचा बनाव रचला होता. त्यानंतर पोलिसांत देखील माहिती दिली होती. त्यानंतर पोलिसांनी तपास सुरू केला होता.

अशातच विहीरीतील पाण्यावर तरंगतांना एक लहान मुलाचा मृतदेह आढळून आला आणि त्यानंतर तपास करत असतांना धक्कादायक प्रकार समोर आला. या घटनेनंतर परिसरात खळबळ उडाली असून विटा पोलिस अधिकचा तपास करत आहे.