तो लग्नात आला अन् वधूच्या भेटवस्तू घेऊन पसार झाला, घटना सीसीटीव्हीत कैद

नागपूर / सुनील ढगे : लग्न समारंभात पाहुणा बनून आलेल्या चोरट्याने वधूची पैशाची पाकिटे आणि दागिने घेऊन पोबारा केल्याची खळबळजनक घटना नागपूरमध्ये घडली आहे. चोरीची सर्व घटना सीसीटीव्ही कॅमेऱ्यात कैद झाली आहे. याप्रकरणी नवीन कामठी पोलीस ठाण्यात तक्रार दाखल करण्यात आली आहे. सीसीटीव्ही फुटेजच्या आधारे पोलीस चोरट्याचा शोध घेत आहेत. एका लॉनमध्ये लग्न समारंभात चोरट्याने पॉकिटात मिळालेल्या भेटवस्तू, पैसे आणि दागिन्यांवर हात साफ केला. एकूण 5 लाख 50 हजाराची चोरी झाल्याचा प्रकार सीसीटीव्हीत कैद झाला आहे.

वधूचे दागिने आणि गिफ्ट गायब

नागपूरच्या नवीन कामठी पोलीस स्टेशन हद्दीतील वसंत खडतकर राहणार भिलगांव यांच्या मुलीचे लग्न होते. त्या लग्न समारंभात आलेल्या पाहुण्यांकडून वधुला मिळालेल्या पाकिटातील रक्कम आणि दागिने वधू बसलेल्या बाजूच्या जागेवर ठेवले होते. यावेळी कुटुंबातील सदस्य पाहुण्यांशी बोलण्यात व्यस्त असताना चोरट्यांनी संधी साधली. अनोळखी चोरट्यांनी पैसे आणि दागिने घेऊन पोबारा केला.

पोलिसांकडून आरोपीचा शोध सुरु

काही वेळात ही गोष्ट लक्षात येताच मिळालेल्या भेट वस्तूंची कुटुंबातील नागरिकांनी शोधाशोध आणि विचारपूस केली. साहित्य कुठेही मिळून न आल्याने लग्नंसमारंभात एकच खळबळ उडाली. लॉनमधील सीसीटीव्ही चेक केले असता त्यात एक चोरटा ते साहित्य घेऊन जाताना दिसल्याने नवीन कामठी पोलिसात तक्रार देण्यात आली.

चोरट्याने जवळपास 5 लाख 50 हजार रुपयांचा मालावर हात साफ केल्याची माहिती कुटुंबातील नागरिकांनी पोलिसांना दिली. त्या आधारे पोलिसांनी गुन्हा दाखल केला असून, सीसीटीव्हीच्या आधारे पोलीस आरोपीचा शोध घेत आहेत.