फक्त 12 लाखात तयार झालेला चित्रपट, ठरला प्रचंड ब्लॉकबस्टर, 32 वर्षानंतर आता पुन्हा होतोय रिलीज, पाहण्यासाठी व्हायची प्रचंड गर्दी
32 वर्षांपूर्वी फक्त 12 लाखांमध्ये तयार झालेला हा चित्रपट, प्रदर्शित होताच ठरला प्रचंड मोठा ब्लॉकबस्टर. आता 9 कोटी खर्च करून पुन्हा 21 ऑगस्टला होणार प्रदर्शित.
हिंदी सिनेसृष्टीतील गाजलेला आणि आजही प्रेक्षकांच्या मनात घर करून असलेला ‘1942: ए लव्ह स्टोरी’ हा चित्रपट तब्बल 32 वर्षांनंतर पुन्हा मोठ्या पडद्यावर येणार आहे. अनिल कपूर, जॅकी श्रॉफ, मनीषा कोईराला, डॅनी डेन्झोंगपा आणि प्राण यांच्या दमदार अभिनयाने सजलेला हा चित्रपट आता 8K रिझोल्यूशन आणि 5.1 डॉल्बी साउंडमध्ये प्रदर्शित होणार आहे. येत्या 21 ऑगस्टला हा नवा अवतार प्रेक्षकांना पाहता येणार आहे. या नव्या व्हर्जनसाठी तब्बल 9 कोटी रुपयांहून अधिक खर्च करण्यात आला आहे.
चित्रपटाचे दिग्दर्शक आणि निर्माते विदु विनोद चोप्रा यांनी एका मुलाखतीत या चित्रपटाच्या निर्मितीमागचे अनेक रंजक किस्से सांगितले. विशेष म्हणजे, चित्रपट तयार होत असताना त्यांच्याकडे पैशांची मोठी कमतरता होती. सेटची उभारणी करताना अनेक गोष्टी बजेटअभावी कमी कराव्या लागत होत्या.
सेट डिझायनर नितिन चंद्रकांत देसाई यांच्यासोबत सेटच्या मॉडेलवर चर्चा सुरू असताना जॅकी श्रॉफ यांनी हस्तक्षेप केला. चित्रपटातील आपल्या शॉटसाठी काही ठराविक गल्ल्या आणि घरं आवश्यक असल्याचे त्यांनी सांगितले. पैसे कमी पडत असतील तर त्यासाठी आपण पैसे देऊ, असे जॅकी श्रॉफ यांनी सांगितले. त्यानंतर अनिल कपूर यांनीही चित्रपटासाठी आर्थिक मदत केली. कलाकारांच्या या सहकार्यामुळे चित्रपटाचे काम पुढे सुरू राहिले.
क्लायमॅक्ससाठी मिळाला होता फक्त एक दिवस
चित्रपटाच्या क्लायमॅक्सचे शूटिंगही मोठे आव्हान होते. या सीनसाठी मोठ्या संख्येने कलाकारांची गरज होती. मात्र, संपूर्ण क्लायमॅक्स शूट करण्यासाठी चोप्रांकडे फक्त एकच दिवस होता. शूटिंग दुसऱ्या दिवसापर्यंत गेले असते तर पुन्हा आर्थिक अडचणी निर्माण झाल्या असत्या. त्यामुळे कोणत्याही परिस्थितीत क्लायमॅक्स एका दिवसात पूर्ण करण्याचा त्यांनी निर्णय घेतला आणि तो प्रत्यक्षात पूर्णही केला.
प्रीमियरच्या वेळी स्वतः बंद केले होते सिनेमागृहाचे दरवाजे
चित्रपटाच्या प्रीमियरचा किस्साही तितकाच भन्नाट आहे. चित्रपट सुरू होण्याच्या वेळी अनेक मान्यवर मोठ्या गाड्यांमधून येत होते. मात्र, काही जण उशिरा पोहोचल्याने त्यांना आत प्रवेश देण्यात आला नाही. विदु विनोद चोप्रा यांनी स्वतः सिनेमागृहाचे दरवाजे बंद करून घेतले होते.
त्यांच्या मते, वेळेवर न येणाऱ्या व्यक्तीला चित्रपट आणि वेळेचा आदर नाही. त्यामुळे कोण कितीही मोठी व्यक्ती असली तरी वेळ संपल्यानंतर प्रवेश दिला जाणार नाही अशी त्यांची भूमिका होती.
