2 तास 18 मिनिटांचा स्पाय थ्रिलर, पाकिस्तानविरोधातील मिशनची कथा, तिथेच 3 आठवड्यांपासून होतोय ट्रेंड

आदित्य धर दिग्दर्शित ‘धुरंधर : द रिव्हेंज’ हा स्पाय थ्रिलर चित्रपट बॉक्स ऑफिसवर अक्षरश: धुमाकूळ घालतोय. फक्त भारतातच नाही तर जगभरात या चित्रपटाचा बोलबाला आहे. या चित्रपटाच्या पहिल्या भागालाही पाकिस्तानकडून विरोध झाला होता. तरीसुद्धा तिथेच त्याचे सर्वाधिक पायरेटेड डाऊनलोड्स आढळून आले होते. ओटीटीवरही ‘धुरंधर’च्या पहिल्या भागाला चांगला प्रतिसाद मिळतोय. रंजक बाब म्हणजे, धुरंधरशिवाय आणखी एक असा स्पाय थ्रिलर चित्रपट आहे, जो पाकिस्तानात भरपूर पाहिला जातोय. या चित्रपटात एका रॉ एजंटची कथा दाखवण्यात आली आहे, जी गुप्तहेर बनून पाकिस्तानात जाते. 2018 मध्ये थिएटरमध्ये प्रदर्शित झालेल्या या चित्रपटाचं नाव ‘राझी’ असं आहे. आलिया भट्टचा हा चित्रपट नेटफ्लिक्स या ओटीटी प्लॅटफॉर्मवर स्ट्रीम होतोय.

पाकिस्तानच्या नेटफ्लिक्सवर ‘राझी’ हा चित्रपट टॉप 10 मध्ये ट्रेंड होऊ लागला आहे. आलिया भट्ट आणि विकी कौशल यांच्या यात मुख्य भूमिका आहेत. पाकिस्तानच्या नेटफ्लिक्सवर ट्रेंड होणाऱ्या टॉप 10 या यादीत हा चित्रपट नवव्या क्रमांकावर आहे. विशेष म्हणजे पाकिस्तानमध्ये हा चित्रपट फक्त एक किंवा दोन दिवसांपासून नाही तर गेल्या तीन आठवड्यांपासून नेटफ्लिक्सवर ट्रेंड होत आहे.

मेघना गुलजारने या चित्रपटाचं दिग्दर्शन केलं होतं आणि त्याचा बजेट जवळपास 35 ते 40 कोटी रुपयांमध्ये होता. जगभरात या चित्रपटाला जबरदस्त प्रतिसाद मिळाला होता. ‘राझी’ने जगभरात 200 कोटी रुपयांपेक्षा अधिक कमाई केली होती. 2018 मध्ये हा चित्रपट प्रदर्शित झाला असला तरी आठ वर्षांनंतरही त्याची लोकप्रियता कायम आहे. या चित्रपटाची कथा हरिंदर सिक्का यांच्या ‘सहमत’ या कादंबरीवर आधारित होती. यामध्ये एका काश्मिरी तरुणीची कथा दाखवण्यात आली आहे, जी वडिलांच्या म्हणण्यानुसार गुप्तहेर बनून पाकिस्तानात जाते. ती एका पाकिस्तानी अधिकाऱ्याशी लग्न करते आणि 1971 च्या भारत-पाकिस्तान युद्धादरम्यान भारताला गुप्त माहिती पुरवण्यात मदत करते. या चित्रपटाने फिल्मफेअरपासून आयफापर्यंत सुमारे 27 पुरस्कार जिंकले होते. या चित्रपटातील आलिया भट्ट आणि विकी कौशल यांच्या दमदार अभिनयकौशल्याची खूप प्रशंसा झाली होती.