अल्का याज्ञनिक यांना स्टार बनवणारं गाणं, 45 वर्षांपासून सुपरहिट, आजही अनेक महिला ऐकतात

90 चं दशक हिंदी चित्रपटसृष्टीतील संगीतासाठी सुवर्णकाळ मानलं जातं. या काळात कुमार सानू, उदित नारायण, सोनू निगम, अलका याज्ञिक आणि अनुराधा पौडवाल यांसारख्या गायकांनी आपल्या सुरांनी प्रेक्षकांना मंत्रमुग्ध केलं. याच काळातील संगीतविश्वाबाबत प्रसिद्ध संगीत निर्माता रमेश तौरानी यांनी एक महत्त्वाचा खुलासा केला आहे. अनुराधा पौडवाल यांनी चित्रपटांसाठी गाणं थांबवून टी-सीरिजवर लक्ष केंद्रित करण्याचा निर्णय घेतला आणि त्याचा मोठा फायदा अलका याज्ञिक यांना झाला असं त्यांनी सांगितलं.

रमेश तौरानी यांनी संगीतकार कुमार सानू यांच्यासोबत चित्रपट व्यापार विश्लेषक कोमल नाहटा यांच्या ‘गेम चेंजर्स : द म्युझिक सीरिज’ या पॉडकास्टमध्ये सहभाग घेतला होता. यावेळी त्यांनी 90 च्या दशकातील हिंदी चित्रपटसंगीत आणि त्या काळातील गायकांच्या लोकप्रियतेबद्दल चर्चा केली.

तौरानी यांच्या म्हणण्यानुसार त्या काळात लता मंगेशकर आणि आशा भोसले या आधीपासूनच संगीतविश्वातील मोठी नावं होती. गाण्यांसाठी लता मंगेशकर यांना आपली पहिली पसंती असल्याचंही त्यांनी सांगितलं. त्यानंतर अलका याज्ञिक आणि अनुराधा पौडवाल यांचा विचार केला जात असे.

‘मेरे अंगने में’मुळे मिळाली पहिली मोठी ओळख

अलका याज्ञिक यांच्या सुरुवातीच्या कारकिर्दीतील महत्त्वाच्या गाण्यांमध्ये ‘मेरे अंगने में तुम्हारा क्या काम है’ या गाण्याचा समावेश होतो. 1981 मध्ये प्रदर्शित झालेल्या ‘लावारिस’ चित्रपटातील या गाण्यामुळे त्यांना फिल्मफेअर पुरस्कारासाठी नामांकन मिळालं होतं. या गाण्याच्या अन्य आवृत्त्या किशोर कुमार आणि अमिताभ बच्चन यांनीही सादर केल्या होत्या.

अनुराधा पौडवाल आणि अलका याज्ञिक या दोघींनीही हिंदी चित्रपटसंगीताला मोलाचं योगदान दिलं. मात्र, अनुराधा पौडवाल यांच्या निर्णयानंतर अलका याज्ञिक यांना मिळालेल्या संधींमध्ये वाढ झाली, हा रमेश तौरानी यांनी सांगितलेला किस्सा आजही 90 च्या दशकातील संगीतविश्वातील बदल अधोरेखित करतो.

‘आशिकी’ आणि ‘साजन’मधील गाण्यांमुळे अनुराधा पौडवाल लोकप्रिय

अनुराधा पौडवाल या 80 च्या दशकाच्या उत्तरार्धात आणि 90 च्या दशकाच्या सुरुवातीला हिंदी चित्रपटसंगीतातील आघाडीच्या गायिकांपैकी एक होत्या. ‘आशिकी’, ‘दिल है कि मानता नहीं’ आणि ‘साजन’ यांसारख्या चित्रपटांमधील त्यांच्या गाण्यांना प्रचंड लोकप्रियता मिळाली. विशेषतः रोमँटिक गाण्यांसाठी त्यांचा आवाज श्रोत्यांच्या पसंतीस उतरला.