माधुरीने या अभिनेत्यासोबत दिले 3 चित्रपट, ठरले प्रचंड फ्लॉप, तुम्ही पाहिले का?

बॉलिवूडमधील दिवंगत अभिनेते ऋषी कपूर आणि अभिनेत्री माधुरी दीक्षित यांनी एकत्रितपणे तीन चित्रपटांमध्ये काम केले. दोघांची जोडी पडद्यावर पाहायला मिळाली असली, तरी त्यांच्या या तिन्ही चित्रपटांना बॉक्स ऑफिसवर अपेक्षित यश मिळाले नाही. यामध्ये ‘साहिबां’, ‘याराना’ आणि ‘प्रेम ग्रंथ’ हे तीनही चित्रपट वेगवेगळ्या कथानकांवर आधारित होते; मात्र थिएटरमध्ये ते फारशी कमाई करू शकले नाहीत.

माधुरी दीक्षित आणि ऋषी कपूर यांचा पहिला चित्रपट ‘साहिबां’ 16 जुलै 1993 रोजी प्रदर्शित झाला होता. रमेश तलवार यांनी या चित्रपटाचे दिग्दर्शन केले होते. चित्रपटात माधुरी दीक्षित, ऋषी कपूर आणि संजय दत्त प्रमुख भूमिकेत होते.

माधुरीने ‘साहिबां’ नावाच्या साध्या गावातील मुलीची भूमिका साकारली होती तर ऋषी कपूर यांनी गोपीची भूमिका केली होती. रोमान्ससोबतच सामाजिक विषमता, संघर्ष आणि ड्रामा पाहायला मिळणाऱ्या या चित्रपटाला मात्र बॉक्स ऑफिसवर फारसे यश मिळाले नाही.

‘याराना’मध्ये माधुरी-ऋषींची वेगळी केमिस्ट्री

यानंतर 1995 मध्ये माधुरी दीक्षित आणि ऋषी कपूर हे ‘याराना’ या रोमँटिक चित्रपटामध्ये एकत्र दिसले. डेव्हिड धवन यांनी दिग्दर्शित केलेला हा चित्रपट 20 ऑक्टोबर 1995 रोजी प्रदर्शित झाला.

चित्रपटात ऋषी कपूर यांनी राज, तर माधुरी दीक्षितने ललिता/शिखाची भूमिका साकारली होती. राज बब्बर यांनी जे.बी. ही महत्त्वाची भूमिका केली होती.

‘प्रेम ग्रंथ’ ठरला महाफ्लॉप

माधुरी दीक्षित आणि ऋषी कपूर यांचा एकत्रित शेवटचा चित्रपट ‘प्रेम ग्रंथ’ होता. 1996 मध्ये प्रदर्शित झालेल्या या चित्रपटाचे दिग्दर्शन ऋषी कपूर यांचे भाऊ राजीव कपूर यांनी केले होते.

चित्रपटात ऋषी कपूर यांनी सोमेन, तर माधुरी दीक्षित यांनी कजरीची भूमिका साकारली होती. सामाजिक विषमता आणि जातीय भेदभावासारख्या गंभीर विषयाला चित्रपटातून स्पर्श करण्यात आला होता. गंभीर सामाजिक विषय आणि दमदार कलाकार असूनही ‘प्रेम ग्रंथ’ बॉक्स ऑफिसवर महाफ्लॉप ठरला.

अशाप्रकारे माधुरी दीक्षित आणि ऋषी कपूर यांची जोडी तीन वेगवेगळ्या चित्रपटांमध्ये पाहायला मिळाली. मात्र ‘साहिबां’, ‘याराना’ आणि ‘प्रेम ग्रंथ’ या तिन्ही चित्रपटांना बॉक्स ऑफिसवर अपेक्षित यश मिळवता आले नाही.