Aruna Irani: पतीच्या निधनानंतर 2 महिन्यांनी अरुणा ईराणी यांचा भावूक व्हिडीओ; म्हणाल्या, शेवटच्या श्वासापर्यंत..
Aruna Irani: पतीच्या निधनानंतर पुन्हा कामाला सुरुवात करणं हा अरुणा इराणी यांच्या आयुष्यातील महत्त्वाचा टप्पा आहे. चाहत्यांनी दिलेल्या प्रेमाचा उल्लेख करत त्यांनी नव्याने सुरुवात करण्याची तयारी दर्शवली आहे.
हिंदी चित्रपटसृष्टीतील ज्येष्ठ अभिनेत्री अरुणा ईराणी सध्या आयुष्यातील कठीण काळातून जात आहेत. पती आणि प्रसिद्ध दिग्दर्शक कुकू कोहली यांच्या निधनानंतर त्या काही काळासाठी कामापासून दूर होत्या. मात्र, आता दोन महिन्यांनंतर त्यांनी पुन्हा कामाला सुरुवात केली आहे. या नव्या सुरुवातीची माहिती त्यांनी सोशल मीडियावर एक भावूक व्हिडीओ शेअर करत चाहत्यांना दिली. या कठीण काळात चाहत्यांनी दिलेलं प्रेम आणि पाठिंबा यामुळेच पुन्हा उभं राहण्याचं बळ मिळाल्याचं त्यांनी सांगितलं. अरुणा ईराणी यांच्या या व्हिडीओनंतर चाहत्यांनी त्यांच्याप्रती प्रेम व्यक्त करत त्यांना धीर दिला आहे.
अरुणा ईराणी यांनी रविवारी 18 ऑक्टोबर रोजी इन्स्टाग्रामवर व्हिडीओ शेअर केला. या व्हिडीओमध्ये त्यांनी चाहत्यांचे आभार मानले. कुकूजींच्या निधनानंतर चाहत्यांनी त्यांना जे प्रेम आणि पाठिंबा दिला, त्याबद्दल त्या मनापासून कृतज्ञ असल्याचं त्यांनी सांगितलं. “कुकूजींच्या निधनानंतर तुम्ही सर्वांनी मला जे प्रेम दिलं आणि माझी साथ दिली, त्याबद्दल मी खूप आभारी आहे. माझ्या आयुष्यातील या कठीण काळात तुम्ही माझ्यासोबत उभे राहाल, याची मला कल्पनाही नव्हती. तुमच्या प्रेमामुळे आणि पाठिंब्यामुळेच आज मी तुमच्यासमोर उभी आहे आणि पुन्हा काम सुरू करू शकले आहे,” अशा भावना त्यांनी व्यक्त केल्या. यापुढेही आयुष्याच्या शेवटच्या श्वासापर्यंत चाहत्यांनी असंच प्रेम आणि साथ द्यावी, अशी अपेक्षाही त्यांनी व्यक्त केली.
पहा व्हिडीओ-
View this post on Instagram
अरुणा ईराणी यांचे पती आणि प्रसिद्ध चित्रपट दिग्दर्शक कुकू कोहली यांचं 25 ऑगस्ट 2026 रोजी वयाच्या 77व्या वर्षी निधन झालं. हृदयविकाराचा तीव्र झटका आल्याने त्यांची प्रकृती खालावली होती. त्यांना मुंबईतील कोकिलाबेन धीरूभाई अंबानी रुग्णालयात दाखल करण्यात आलं होतं. मात्र, डॉक्टरांच्या प्रयत्नांनंतरही त्यांना वाचवता आलं नाही. पतीच्या निधनानंतर अरुणा ईराणी यांना मोठा धक्का बसला होता. त्यांच्या अंत्यसंस्कारावेळी त्या अत्यंत भावूक झाल्याचं पाहायला मिळालं. कुटुंबीय आणि मित्रपरिवाराने या कठीण प्रसंगी त्यांना आधार दिला. आता चाहत्यांच्या प्रेमामुळे पुन्हा काम सुरू करण्याचं बळ मिळाल्याचं त्यांनी सांगितलं आहे.
कुकू कोहली यांनी हिंदी चित्रपटसृष्टीत दिग्दर्शक म्हणून महत्त्वपूर्ण योगदान दिलं. 1991 मध्ये प्रदर्शित झालेल्या ‘फूल और कांटे’ या चित्रपटातून त्यांनी दिग्दर्शन क्षेत्रात पदार्पण केलं. याच चित्रपटातून अभिनेता अजय देवगणने प्रमुख भूमिकेतून हिंदी चित्रपटसृष्टीत प्रवेश केला. याशिवाय ‘सुहाग’, ‘हकीकत’, ‘अनाड़ी नंबर १’ आणि ‘ये दिल आशिकाना’ यांसारख्या चित्रपटांचंही त्यांनी दिग्दर्शन केलं. अरुणा ईराणी यांनी बालकलाकार म्हणून आपल्या कारकिर्दीला सुरुवात केली. पुढे त्यांनी हिंदी, मराठी आणि गुजराती चित्रपटांमध्ये विविध भूमिका साकारत स्वतःची वेगळी ओळख निर्माण केली. ‘कारवाँ’, ‘बॉबी’, ‘बेटा’, ‘राजा बाबू’ आणि ‘दिल तो पागल है’ यांसारख्या चित्रपटांमधील त्यांच्या भूमिका विशेष गाजल्या. चित्रपटांबरोबरच त्यांनी छोट्या पडद्यावरही काम केलं.
