Dhurandhar 2 : ‘धुरंधर 2’ची डिमांड एवढी की थिएटर मालकांना घ्यावा लागला मोठा निर्णय
Dhurandhar 2 : रणवीर सिंहच्या या चित्रपटाची प्रेक्षक आतुरतेने वाट पाहत आहेत. ॲडव्हान्स बुकिंगद्वारेच या चित्रपटाने जगभरात कोट्यवधी रुपयांची कमाई केली आहे. प्रेक्षकांची इतकी वाढती मागणी पाहून थिएटर मालकांनीही महत्त्वपूर्ण निर्णय घेतला आहे.
आदित्य धर दिग्दर्शित ‘धुरंधर : द रिव्हेंज’ या चित्रपटाच्या प्रदर्शनाला अवघे 48 तास राहिले आहेत. या चित्रपटाची इतकी क्रेझ आहे की ॲडव्हान्स बुकिंगमध्येच सर्व शोज हाऊसफुल झाले आहेत. जगभरातील ॲडव्हान्स बुकिंग कलेक्शनच्या बाबतीत रणवीर सिंहचा हा चित्रपट सर्व रेकॉर्ड मोडत आहे. ‘धुरंधर 2’चे लाखो तिकिट्स विकले गेले आहेत. या चित्रपटासाठी प्रेक्षकांमध्ये असलेली एवढी क्रेझ पाहून अखेर थिएटर मालकांना महत्त्वाचा निर्णय घ्यावा लागला आहे. त्यांनी रात्री उशिराचे आणि मध्यरात्रीचेही काही शोज नव्याने समाविष्ट केले आहेत. त्यामुळे भारतातील अनेक भागात या चित्रपटाचे 24 तास शोज लागणार आहेत.
24 तासांचे शोज
‘धुरंधर 2’चे आतापर्यंत भारतात 15 लाख तिकिटं विकली गेली आहेत. यापैकी निम्मा आकडा हा बुधवारी पार पडणाऱ्या प्रिव्ह्यू शोजसाठी आहे. जवळपास चार तासांच्या या चित्रपटासाठी थिएटरमध्ये एका स्क्रीनवर चारपेक्षा अधिक शोज लावले जाणार आहेत. प्रेक्षकांची वाढती मागणी पाहून बऱ्यात थिएटर चेन्सने मध्यरात्रीचेही शोज समाविष्ट केले आहेत. भारतीय सिनेसृष्टीच्या इतिहासात असं क्वचित एखाद्या चित्रपटाबाबत घडतं. यावरून या चित्रपटाची लोकप्रियता लक्षात येते.
मुंबई आणि ठाण्यातील पीव्हीआर चकाला, मूव्ही मॅक्स सायन यांसारख्या थिएटर्समध्ये वीकेंडला मध्यरात्री 1.50 पासूनचे शोज लावण्यात आले आहेत. रात्री 11.30 पर्यंत हे शोज वेगवेळ्या स्क्रीन्सवर लावले जाणार आहेत. लॉजिस्टिक आणि सुरक्षेशी संबंधित कारणांमुळे सर्वच शहरांमध्ये हे शक्य नसलं, तरी पश्चिम आणि दक्षिण भारतातील अनेक थिएटर्स 24 तासांत याच मार्गाचा अवलंब करतील आणि रात्री उशिराचे शोज सुरू करतील, असं म्हटलं जात आहे.
मराठा मंदिरमधील DDLJ च्या शोची वेळ बदलली
‘धुरंधर 2’च्या लोकप्रियतेचं सर्वांत मोठं उदाहरण म्हणजे मुंबईतल्या आयकॉनिक मराठा मंदिर थिएटरमध्येही या चित्रपटाने आपली जागा निश्चित केली आहे. गेल्या 30 वर्षांपासून सलग या थिएटरमध्ये शाहरुख खान आणि काजोलचा ब्लॉकबस्टर ‘दिलवाले दुल्हनिया ले जाएंगे’ हा चित्रपट दाखवला जात होता. दररोज सकाळी 11.30 वाजता या चित्रपटाचा शो इथे लावला जात होता. परंतु आता ‘धुरंधर 2’मुळे या चित्रपटाची वेळ बदलण्यात आली आहे.
ॲडव्हान्स बुकिंगच्या बाबतीत ‘धुरंधर 2’ने सर्व रेकॉर्ड मोडले आहेत. पेड प्रीव्ह्यूजमध्ये जवळपास 8 लाख तिकिटं विकली गेली असून 35 कोटी रुपयांची कमाई त्यातून झाली आहे. रणवीरच्या या चित्रपटाने ॲडव्हान्स बुकिंगमधून तब्बल 21 कोटी रुपयांची कमाई केली आहे. जगभरातील ॲडव्हान्स बुकिंगचा आकडा तब्बल 125 कोटी रुपयांवर पोहोचला आहे. त्यामुळे आदित्य धर दिग्दर्शित हा चित्रपट कमाईचे सर्व विक्रम मोडणार, असा अंदाज व्यक्त होत आहे.
