टाईट पँट घातल्याने पोलिसांनी ‘सेक्रेड गेम्स’च्या अभिनेत्रीला घेतलं ताब्यात; त्यानंतर जे घडलं..
अभिनेत्रीने सांगितला 'तो' भयावह अनुभव; वाचून अंगावर येईल काटा
मुंबई- गेल्या काही दिवसांपासून इराणमधील हिजाबचा (Iran Hijab Protest) वाद चांगलाच पेटला आहे. तेहरानच्या पोलीस कोठडीत 22 वर्षीय महसा अमिनी (Mahsa Amini) या तरुणीचा मृत्यू झाला. महसाने हिजाब योग्य प्रकारे परिधान केला नव्हता, म्हणून तिला पोलिसांनी अटक केली होती. पोलीस कोठडीत तिच्यावर अत्याचार झाल्याचीही माहिती समोर येत आहे. सोशल मीडियावर व्हायरल झालेल्या काही फोटोंमध्ये तिच्या शरीरावर मारहाणीचे घाव दिसत आहेत. अशातच अचानक तिचा पोलीस कोठडीत मृत्यू झाला. महसाच्या मृत्यूनंतर इराणमधील हिजाबचा वाद आणखी पेटला आहे. यादरम्यान आता इराणमध्ये राहणारी बॉलिवूड अभिनेत्री एलनाज नौरोजी (Elnaaz Norouzi) हिच्या एका व्हिडीओने नेटकऱ्यांचं लक्ष वेधलं आहे. एलनाजचं पूर्ण कुटुंब इराणमध्ये आहे आणि तिचा त्यांच्याशी संपर्क होऊ शकत नाहीये.
एलनाजने तिच्या इन्स्टाग्राम अकाऊंटवर एक व्हिडीओ पोस्ट केला आहे. या व्हिडीओमध्ये ती इराणमधल्या भयानक परिस्थितीबद्दल बोलताना दिसतेय. इराणमध्ये काय घडतंय हे इतर देशांना दिसू नये, माध्यमांसमोर येऊ नये, यासाठी इंटरनेट कनेक्शन कापल्याचंही तिने सांगितलंय.
टाइट जीन्स घातल्याने पोलिसांनी घेतलं ताब्यात
एलनाज जेव्हा इराणमध्ये होती, तेव्हा एकदा पोलिसांनी तिलासुद्धा ताब्यात घेतलं होतं. आता जे महसा अमिनीसोबत घडलं, तेच त्यावेळी माझ्यासोबतही घडलं असतं, असं ती म्हणाली. “काही वर्षांपूर्वी मी इराणला गेले होते आणि शेवटच्या दिवशी तेहरानमध्ये होती. मी माझ्या चुलत भावासोबत रस्त्यावर चालत होती आणि अचानक एक महिला माझ्यासमोर आली म्हणाली, “हे काय आहे?” ती नेमकं कशाबद्दल बोलतेय, हे मला कळत नव्हतं. तिने पुन्हा तोच प्रश्न विचारला. मी टाइट जीन्स परिधान केल्याने गश्त-ए-इरशाद मॉरल पोलिसांनी मला ताब्यात घेतलं होतं. मला व्हॅनमध्ये बसवून ते ‘रि-एज्युकेशन’ सेंटर घेऊन गेले होते”, असं तिने सांगितलं.
View this post on Instagram
घडलेल्या घटनेबद्दल ती पुढे म्हणाली, “महसा अमिनीलासुद्धा तिथेच घेऊन गेले होते. त्याठिकाणी मला खूप वेळ थांबवलं होतं. जोपर्यंत माझ्यासाठी कोणी सैल कपडे घेऊन येत नाही, तोपर्यंत त्यांनी मला तिथे बसवून ठेवलं होतं. माझा चुलत भाऊ खूप घाबरला होता. कुटुंबीयसुद्धा भयभीत झाले होते. कारण तिथे पोहोचल्यानंतर त्यांनी माझा पासपोर्ट आणि फोन जप्त केला होता. इराणमध्ये या अत्यंत भयावह गोष्टी घडत आहेत. तुमच्या नखांवरील नेलपेंटचा कलर, तुमचा हिजाब, कपडे यांसारख्या क्षुल्लक कारणांवरून पोलीस ताब्यात घेतात.”
रि-एज्युकेशन सेंटरमधील त्या घटनेबद्दल तिने सांगितलं, “तुम्हाला तुरुंगात डांबल्यानंतर ते तुमचे फोटो काढतात. तुमची सर्व माहिती काढून घेतात. तुम्हाला कोणत्या घटनेबद्दल अटक होईल हेच सांगता येत नाही. अनेकदा महिला आणि मुली तिथून परत येऊ शकत नाहीत.”
एलनाज तिच्या इन्स्टाग्राम अकाऊंटवर इराणमधल्या या परिस्थितीचे फोटो आणि व्हिडीओ सातत्याने पोस्ट करतेय. तिथल्या परिस्थितीविरोधात आवाज उठवण्याची मागणी ती चाहत्यांना आणि इतर देशांना करतेय.
एलनाजने ‘सेक्रेड गेम्स’ या वेब सीरिजमध्ये भूमिका साकारली होती. काही दिवसांपूर्वी प्रदर्शित झालेल्या ‘जुग जुग जियो’ या चित्रपटातही ती झळकली होती.
