Iran Anti Hijab Video: नाचत, गात हिजाब जाळले, पारतंत्र्याचं ओझं डोक्यावरुन उतरवलं, इराणी महिलांचा एल्गार
हे चित्र इराणमधलं आहे, जिथं धर्माबद्दल ब्र काढणंही इथं मृत्यूदंडाला पात्र ठरतं. पण या तरुणींमधील मृत्यूबद्दलची भितीच संपलेली दिसते.
नवी दिल्ली: इराणमध्ये सध्या हिजाबविरोधात (Iran Anti Hijab Protest) चांगलंच वातावरण तापलं आहे.महिला रस्त्यावर उतरुन डोक्यावरील हिजाब (Iran Women) काढून फेकत आहेत. सार्वजनिक ठिकाणी आंदोलनं सुरु आहेत, जिथं या हिजाबची होळी ( Burning Hijab ) केली जात आहे. बुरखा आणि हिजाबविरोधातील या आंदोलनाची जगभर दखल घेतली जात आहे. नाचत-गात हिजाब जाळणाऱ्या महिलांचा असाच एक व्हिडीओ (Viral Video) आता व्हायरल होत आहे.
या व्हिडीओमध्ये शेकडो महिला शहराच्या चौकामध्ये जमलेल्या दिसत आहेत. त्यात अनेक पुरुषही आहेत, हे सर्वजण टाळ्या वाजवत आहेत, मागे ड्रमचाही आवाज येत आहे. या गर्दीच्या मधोमध एक शेकोटी पेटवली आहे. या शेकोटीसमोर एक-एक करुन महिला, तरुणी येतात, तिथं नाचतात, आपला हिजाब उतरवतात आणि तो आगीत फेकून देतात.
हा व्हिडीओ कुठल्याही साध्या आंदोलनासारखा वाटत असला, तरी तो तसा नाही आहे. हे चित्र इराणमधलं आहे, जिथं धर्माबद्दल ब्र काढणंही इथं मृत्यूदंडाला पात्र ठरतं. पण या तरुणींमधील मृत्यूबद्दलची भितीच संपलेली दिसते. कारण, त्यांना या हिजाबमध्ये त्यांचं भविष्य अंधकारात गेल्याचं दिसत आहे.
पाहा व्हिडीओ
View this post on Instagram
इराणमध्ये हिजाबविरोधाची ठिणगी पडली ती एका तरुणीच्या मृत्यूनंतर. त्याचं झालं असं, इराणमध्ये हिजाबची सक्ती आहे, यासाठी कठोर नियमही आहेत. याच प्रकरणी पोलिसांनी 22 वर्षांच्या महसा अमिनी या तरुणीला ताब्यात घेतलं. मात्र, त्यावेळी तिला मारहाण झाली असा आरोप झाला. या मारहाणीनंतर ही तरुणी कोमात गेली आणि अखेर 3 दिवस कोमात राहिल्यानंतर तिचं निधन झालं.
या तरुणीच्या निधनानंतर सगळीकडे आंदोलनं सुरु झाली, इराणमधील अनेक शहरात सध्या ही आंदोलनं सुरु आहेत. या आंदोलनात तरुणींचा मोठा सहभाग आहे. विशेष म्हणजे, शेकडो तरुणही या मुलींना पाठिंबा देण्यासाठी रस्त्यावर उतरत आहेत. थेट व्यवस्थेला आव्हान देणारं हे आंदोलन आवाक्यात आणणं सरकारला कठीण झालं आहे. विशेष म्हणजे, इराणच्या सत्तेत असलेल्या काही महिला खासदारांनीही आंदोलनाला खुला पाठिंबा दिला आहे.
इराणमध्ये महिलांवर अनेक बंधनं आहेत, ही सगळी बंधनं झुगारुन या महिला रस्त्यावर उतरत आहेत, पारतंत्र्याचं ओझं काढून फेकत आहेत, आणि समान अधिकारांसाठी भांडत आहेत.
