Sunil Tatkare | विलिनीकरणाला 35 आमदारांचा पाठिंबा? काय म्हणाले सुनील तटकरे?

दोन्ही राष्ट्रवादी काँग्रेस पक्षांनी एकत्र यावे, अशी इच्छा पक्षातील सुमारे 35 आमदारांची असल्याचे वक्तव्य राष्ट्रवादीचे नेते हिरामण खोसकर यांनी केले होते. त्यांच्या या विधानानंतर राजकीय वर्तुळात चर्चांना उधाण आले आहे. या पार्श्वभूमीवर राष्ट्रवादीचे नेते सुनील तटकरे यांनी माध्यमांशी संवाद साधत प्रतिक्रिया दिली. तटकरे म्हणाले की, “मी हिरामण खोसकर यांच्याशी याबाबत नक्कीच बोलेन. ते आमचे वरिष्ठ सहकारी आहेत. त्यांनी त्यांच्या भावना व्यक्त केल्या असतील. त्या संदर्भात आम्ही बसून चर्चा करू.” तटकरे यांनी खोसकर यांच्या वक्तव्याला थेट समर्थन किंवा विरोध न दर्शवता सावध भूमिका घेतली. त्यांनी या विषयावर अधिक भाष्य करण्याचे टाळले. त्यामुळे पक्षांतर्गत चर्चांना अधिक वेग येण्याची शक्यता व्यक्त केली जात आहे. दरम्यान, दोन्ही राष्ट्रवादी पक्षांच्या विलिनीकरणावर अद्याप अधिकृत निर्णय जाहीर झालेला नाही. मात्र, पक्षातील काही आमदारांकडून एकत्र येण्याची इच्छा व्यक्त होत असल्याने येत्या काळात या घडामोडींना वेग येण्याची शक्यता आहे.