बॉक्स ऑफिसवरील महाफ्लॉप चित्रपट आता OTT वर; दिग्गज अभिनेत्याच्या शेवटच्या सिनेमाने प्रेक्षकांना रडवलं

ओटीटी प्लॅटफॉर्मवर दर आठवड्यात नवनवीन चित्रपट आणि वेब सीरिज प्रेक्षकांच्या भेटीला येत असतात. अशातच या आठवड्यात एक असा चित्रपट ओटीटीवर आला आहे, ज्याची प्रतीक्षा गेल्या दोन महिन्यांपासून होती. या चित्रपटाला बॉक्स ऑफिसवर जरी अपेक्षित यश मिळालं नसलं तरी सोशल मीडियावर त्याचं बरंच कौतुक झालं. एका पदार्पणातील अभिनेत्याचं दिग्गज अभिनेत्यासोबत स्क्रीनवर टक्कर पहायला मिळाली. अनेकदा थिएटरमध्ये अपयशी ठरलेले चित्रपट ओटीटी प्लॅटफॉर्मवर उत्तम कामगिरी करतात. त्यामुळे हा महाफ्लॉप चित्रपट आता ओटीटीवर ट्रेंड होणार का, हे पाहणं महत्त्वाचं ठरणार आहे.

या चित्रपटाचं नाव आहे ‘इक्कीस’. श्रीराम राघवन दिग्दर्शित या चित्रपटात अमिताभ बच्चन यांचा नातू अगस्त्य नंदा आणि दिवंगत अभिनेते धर्मेंद्र यांच्या भूमिका आहेत. धर्मेंद्र यांच्या करिअरमधला हा शेवटचा चित्रपट असल्याने प्रेक्षक थिएटरमध्ये बघताना भावूक झाले होते. त्यांच्या निधनाच्या काही दिवसांनीच हा चित्रपट थिएटरमध्ये प्रदर्शित झाला होता. लेफ्टनंट अरुण खेत्रपाल यांच्या आयुष्यावर या चित्रपटाची कथा आधारित आहे. वयाच्या अवघ्या 21 व्या वर्षी ते 1971 मधील भारत-पाकिस्तानच्या युद्धात देशासाठी शहीद झाले होते.

‘इक्कीस’मध्ये अगस्त्य नंदा आणि धर्मेंद्र यांच्यासोबतच अक्षय कुमारची भाची सिमरन भाटिया, जयदीप अहलावत, जितेंद्र सिंह, सुहासिनी मुळ्ये, सिकंदर खेर, राहुल देव आणि विवान शाह यांच्याही भूमिका आहेत. हा चित्रपट आधी 25 डिसेंबर रोजी थिएटरमध्ये प्रदर्शित होणार होता, परंतु नंतर 1 जानेवारी 2026 रोजी तो मोठ्या पडद्यावर रिलीज करण्यात आला. या चित्रपटाला प्रेक्षक-समिक्षकांकडून सकारात्मक रिव्ह्यू मिळाले, परंतु बॉक्स ऑफिसवर काही विशेष कमाई होऊ शकली नाही. ‘बॉलिवूड हंगामा’ने दिलेल्या माहितीनुसार, या चित्रपटाने जगभरात फक्त 36 कोटी रुपये कमावले होते. आता जवळपास दोन महिन्यांनंतर अगस्त्य नंदाचा हा चित्रपट ओटीटीवर स्ट्रीम होतोय. हा चित्रपट तुम्ही अॅमेझॉन प्राइम व्हिडीओवर पाहू शकता.

हा चित्रपट पाहिल्यानंतर अमिताभ बच्चन यांनी त्यांच्या ब्लॉगमध्ये नातू अगस्त्य नंदाचं कौतुक केलं होतं. अगस्त्यच्या जन्मापासून ते मोठ्या पडद्यावर त्याला पाहण्यापर्यंतच्या काही दुर्मिळ आठवणी त्यांनी शब्दांत मांडल्या होत्या.