मौनव्रतानंतर लता मंगेशकरांनी गायलेलं हे अजरामर गाणं, 64 वर्षांनंतरही क्रेझ कायम, आजही प्रेक्षक..
करिअरच्या शिखरावर असताना लता मंगेशकर यांनी घेतला होता गायकीतून ब्रेक. मौनव्रतानंतर गाणं गायलं अन् ठरलं प्रचंड सुपरहिट. 64 वर्षानंतर देखील प्रचंड सुपरहिट.
लता मंगेशकर यांना ‘सुरों की रानी’, ‘स्वर कोकिला’ आणि ‘स्वर साम्राज्ञी’ म्हणून ओळखलं जातं. त्यांच्या आवाजातील गोडवा आणि भावनांची ताकद अशी होती की, त्यांचं गाणं ऐकताना प्रेक्षक मंत्रमुग्ध होत. प्रसिद्ध गायक-संगीतकार हेमंत कुमार यांनीही एकदा लता मंगेशकर यांच्या गायकीचं कौतुक करताना, त्या गाताना एखादी महिला संत भक्तिगीत गात असल्याचा भास होतो असं म्हटलं होतं.
लता मंगेशकर यांनी 1942 मध्ये ‘किति हसाल’ या मराठी चित्रपटातून गायकीच्या क्षेत्रात पदार्पण केलं. त्यानंतर त्यांनी मागे वळून पाहिलं नाही. त्यांच्या आवाजाची जादू संपूर्ण देशभर पोहोचली आणि त्या काळातील जवळपास प्रत्येक संगीतकाराला त्यांच्यासोबत काम करण्याची इच्छा होती.
काही काळ गायकीपासून दूर राहण्याचा सल्ला
मात्र, करिअरच्या शिखरावर असतानाच लता मंगेशकर यांच्या आयुष्यात एक कठीण काळ आला. 1960 च्या दशकात त्यांच्या स्वरयंत्राशी संबंधित समस्या निर्माण झाल्यामुळे त्यांना गाणं म्हणणं कठीण झालं होतं. त्यावेळी प्रसिद्ध शास्त्रीय गायक उस्ताद आमिर खान यांनी त्यांना काही काळ गायकीपासून दूर राहण्याचा सल्ला दिला.
उस्तादांचा सल्ला मानत लता मंगेशकर यांनी काही काळ गायकीतून ब्रेक घेतला. त्या काळात त्यांनी मौनव्रतही पाळल्याचं सांगितलं जातं. 2010 मध्ये इंदूरमधील एका कार्यक्रमादरम्यान सूत्रसंचालक संजय पटेल यांनी याबाबत माहिती दिली होती. लता मंगेशकर यांचे धाकटे बंधू आणि संगीतकार-गायक हृदयनाथ मंगेशकर यांनी याचा उल्लेख केल्याचं त्यांनी सांगितलं होतं.
सर्वोत्कृष्ट महिला पार्श्वगायिकेचा फिल्मफेअर पुरस्कार
लता मंगेशकर यांनी अचानक गायकीपासून दूर राहिल्याने त्या पुन्हा गाणार नाहीत, अशा चर्चांनाही त्या काळात उधाण आलं होतं. मात्र, हेमंत कुमार यांनी त्यांना पुन्हा गाण्यासाठी तयार केलं. त्यांना ‘बीस साल बाद’ या चित्रपटासाठी लता मंगेशकर यांचा आवाज हवा होता. त्यांच्या आग्रहानंतर लता मंगेशकर यांनी ‘कहीं दीप जले, कहीं दिल’ हे अजरामर गाणं गायलं.
हे गाणं प्रचंड लोकप्रिय ठरलं आणि त्यानंतर लता मंगेशकर यांच्या कारकिर्दीतील आणखी एक स्वर्णिम पर्व सुरू झालं. या गाण्यासाठी त्यांना सर्वोत्कृष्ट महिला पार्श्वगायिकेचा फिल्मफेअर पुरस्कारही मिळाला. गाण्याला हेमंत कुमार यांनी संगीत दिलं होतं, तर गीतकार शकील बदायूंनी होते.
