Manushi Chhillar: मानुषी छिल्लर ‘या’ बिझनेसमनला करतेय डेट; दोघांच्या वयात 10 वर्षांचं अंतर
मानुषी छिल्लर लिव्ह इन रिलेशनशिपमध्ये? 'या' बिझनेसमनशी जोडलं जातंय नाव
मुंबई: ‘मिस वर्ल्ड’चा किताब जिंकलेली मॉडेल आणि अभिनेत्री मानुषी छिल्लर सध्या तिच्या खासगी आयुष्यामुळे चर्चेत आली आहे. 25 वर्षीय मानुषी ही तिच्यापेक्षा दहा वर्षांनी मोठा असलेल्या एका व्यावसायिकाला डेट करत असल्याची माहिती समोर आली आहे. मात्र याबद्दल अद्याप तिने कोणतीच प्रतिक्रिया दिलेली नाही. मानुषी काही दिवसांपूर्वीच ‘सम्राट पृथ्वीराज’ या चित्रपटात झळकली होती. हा तिचा पहिला बॉलिवूड चित्रपट होता. मात्र या चित्रपटाला बॉक्स ऑफिसवर फारसं यश मिळालं नाही.
मानुषी ही व्यावसायिक निखिल कामतला डेट करत असल्याची जोरदार चर्चा आहे. 35 निखिल हा ‘झेरोधा’ या ऑनलाइन ट्रेडिंग कंपनीचा सहमालक आहे. गेल्या वर्षभरापासून हे दोघं डेट करत असल्याचं म्हटलं जात आहे. मात्र रिलेशनशिपबद्दल त्यांनी कमालिची गुप्तता पाळली आहे.
काही दिवसांपूर्वीच मानुषी आणि निखिल एकत्र राहू लागले, अशीही माहिती समोर येत आहे. मानुषी सध्या तिच्या बॉलिवूडमधील करिअरवर लक्ष केंद्रीत करत असल्याने तिला खासगी आयुष्याविषयी फारसं बोलायचं नाही. दोघांच्याही कुटुंबीयांना आणि जवळच्या मित्रमैत्रिणींना मात्र या रिलेशनशिपची संपूर्ण माहिती आहे.
निखिल कामतने 18 एप्रिल 2019 रोजी इटलीतील फ्लॉरेन्समध्ये अमांडा पुर्वांकराशी लग्न केलं होतं. मात्र लग्नाच्या वर्षभरातच दोघांनी विभक्त होण्याचा निर्णय घेतला. 2021 मध्ये या दोघांनी घटस्फोट घेतला.
मानुषीने 2017 मध्ये ‘मिस वर्ल्ड’चा किताब जिंकला होता. तेव्हापासून ती प्रकाशझोतात आली, मात्र या पाच वर्षांत तिच्या डेटिंगच्या चर्चा कधीच नव्हत्या. या वर्षी तिने अक्षय कुमारच्या ‘सम्राट पृथ्वीराज’ या चित्रपटातून बॉलिवूडमध्ये पदार्पण केलं. यामध्ये तिने संयोगिताची भूमिका साकारली होती.
