Naseeruddin Shah : भाजपला लोकांचं ब्रेनवॉश करायचंय, त्यांना घाबरवायचं…नसिरुद्दीन शाह यांचं वादग्रस्त वक्तव्य

ज्येष्ठ अभिनेते नसिरुद्दीन शाह स्पष्टवक्तेपणासाठी ओळखले जातात. देशासमोरील लहान-मोठ्या प्रत्येक समस्येवर ते आपलं मत मांडतात. अलीकडेच, ते ‘कॉकरोच जनता पार्टी’च्या आंदोलनाचा भाग होते, ज्यामध्ये मुख्य निवडणूक आयुक्त ज्ञानेश कुमार यांच्या विरोधात आंदोलन करण्यात आलं होतं. आता, अभिनेत्याने भाजपवर उघडपणे टीका केली आहे. नसिरुद्दीन शाह म्हणाले की, ‘बंगालच्या निवडणुकीतील फसव्या विजयानंतर, हा भाजप, एक खोटा पक्ष, आता त्याच्या विचारधारा आणि धोरणांशी असहमत असलेल्या सर्वांवर सूड उगवण्यासाठी टपला आहे.’

‘या सूडाचे ताजे बळी सत्यजित रे फिल्म अँड टेलिव्हिजन इन्स्टिट्यूटमधील विद्यार्थी आणि नवोदित चित्रपट निर्माते आहेत. प्रशासनाकडून त्यांना कारणे दाखवा नोटीस बजावण्यात आली आहे, त्यांच्यावर पाळत ठेवण्यात आली आहे, त्यांना धमक्या देण्यात आल्या आहेत आणि आता तर वसतिगृह रिकामं करण्यासही सांगितलं जात आहे. भाजप केवळ स्वतःच्या बाजूनं निर्लज्ज प्रचार करून समाधानी नाही, तर आता त्यांना लोकांचं ब्रेनवॉश करायचं आहे किंवा त्यांना घाबरवायचं आहे…’ असं नसिरुद्दीन शाह म्हणाले.

नसिरुद्दीन शाह यांनी विद्यार्थ्यांना पाठिंबा देण्याची आणि भाजपवर टीका करण्याची ही पहिली वेळ नाही. यापूर्वी, जुलैमध्ये झालेल्या विद्यार्थी आंदोलनादरम्यान, या अभिनेत्यानं आंदोलक विद्यार्थ्यांना पाठिंबा दिला होता आणि त्यांच्यावरील कारवाईवर टीका केली होती. जुलैमध्ये, नसिरुद्दीन यांनी सरन्यायाधीशांच्या ‘चलो संसद’ मोर्चादरम्यान झालेल्या कारवाईविरोधात आवाज उठवला होता. त्यांनी आंदोलकांवरील हिंसाचाराचा निषेध केला आणि त्यात सामील असलेल्यांची तुलना अमेरिकेच्या ICE एजंटशी केली. इन्स्टाग्रामवर शेअर केलेल्या एका व्हिडिओमध्ये, त्यांनी तरुण आंदोलकांना दिलेल्या वागणुकीबद्दल आपला संताप व्यक्त केला आणि म्हटलं की, देशातील तरुणांबद्दलची त्यांची आशा अधिक दृढ झाली आहे.

त्यावेळी नसीरुद्दीन शाह म्हणाले होते, ‘मला तुम्हा सर्वांना दोन गोष्टी सांगायच्या आहेत. पहिली गोष्ट म्हणजे, जर एखादी अज्ञानी व्यक्ती या देशाचे नेतृत्व करत असेल, तर संपूर्ण देशानं त्याच्यासारखंच अज्ञानी, मूर्ख आणि हृदयहीन व्हावं अशी त्याची इच्छा असेल.’