लाखो रुपये देऊन बोलावलं, पण अंजलीने 15 मिनिटांमध्ये सोडला कार्यक्रम, आता आयोजकांनी दिला थेट इशारा

सोशल मीडिया स्टार ते अभिनेत्री असा प्रवास करणारी अंजली अरोरा पुन्हा एकदा चर्चेत आली आहे. ‘कच्चा बादाम’ या गाण्यावर डान्स करून लोकप्रिय झालेल्या अंजलीचा कानपूरमधील एका कार्यक्रमातील व्हिडीओ सध्या सोशल मीडियावर व्हायरल होत आहे. कार्यक्रमात ‘कच्चा बादाम’ गाणे वाजल्यानंतर ती DJ वर नाराज झाल्याचे व्हिडीओमध्ये दिसत असल्याचा दावा केला जात आहे. या घटनेनंतर कार्यक्रमाच्या आयोजकांनी अंजलीवर प्रसिद्धीसाठी हा प्रकार केल्याचा आरोप केला असून, कायदेशीर कारवाईचा इशाराही दिला आहे.

व्हायरल व्हिडीओनुसार, अंजली अरोरा कानपूरमधील एका कार्यक्रमात स्टेजवर उपस्थित होती. त्यावेळी DJ वाल्याने ‘कच्चा बादाम’ हे गाणे वाजवले. यानंतर अंजली DJ जवळ जाऊन नाराजी व्यक्त करताना दिसली. या प्रकारामुळे कार्यक्रमात नेमके काय घडले, याबाबत चर्चा सुरू झाली आहे.

आयोजकांचा पब्लिसिटी स्टंटचा आरोप

कार्यक्रमाच्या आयोजकांनी ‘स्टेट मीडिया 24’शी बोलताना अंजलीच्या वागणुकीवर आक्षेप घेतला. त्यांच्या मते, हा प्रकार प्रसिद्धी मिळवण्यासाठी करण्यात आला होता. एखादी अडचण असल्यास ती कार्यक्रम व्यवस्थापनाशी चर्चा करून सोडवता आली असती असेही त्यांनी म्हटले.

आयोजकांच्या दाव्यानुसार, अंजलीला कार्यक्रमासाठी लाखो रुपये मानधन देण्यात आले होते. मात्र, वादानंतर ती अवघ्या 15 मिनिटांत स्टेज सोडून निघून गेल्याचा आरोप त्यांनी केला. या प्रकरणी तिच्याविरोधात कायदेशीर कारवाई करण्याचा इशाराही आयोजकांनी दिला आहे. मात्र, या आरोपांवर अंजलीची बाजू किंवा तिची अधिकृत प्रतिक्रिया समोर आल्याची माहिती दिलेल्या वृत्तात नाही.

‘कच्चा बादाम’मुळे मिळाली लोकप्रियता

अंजली अरोराला ‘कच्चा बादाम’ या गाण्यावरील डान्समुळे देशभरात लोकप्रियता मिळाली होती. सोशल मीडियावरील व्हिडीओमुळे तिचा मोठा चाहतावर्ग तयार झाला. त्यानंतर तिने मनोरंजन क्षेत्रात आपली ओळख निर्माण केली.

अंजलीने ‘महाकाव्य श्री रामायण कथा’ या चित्रपटातून मोठ्या पडद्यावर पदार्पण केल्याचे वृत्त आहे. या चित्रपटात तिने माता सीतेची भूमिका साकारली तर भगवान श्रीरामांच्या भूमिकेत देव शर्मा दिसले. मात्र, सीतेची भूमिका साकारल्यामुळेही तिला सोशल मीडियावर टीकेचा सामना करावा लागला होता.

सध्या कानपूरमधील कार्यक्रमातील प्रकारामुळे अंजली अरोरा पुन्हा चर्चेत आली असून, आयोजकांचे आरोप आणि संभाव्य कायदेशीर कारवाई याकडे सर्वांचे लक्ष लागले आहे.