सामान्यांना धक्काबुक्की अन् ही मात्र..; लालबागचा राजाच्या चरणांजवळून परिणीती चोप्राचा व्हिडीओ कॉल, चिडले नेटकरी
Lalbaughcha Raja: एकीकडे सर्वसामान्यांना धक्काबुक्की होत असताना परिणीती मात्र निवांत पतीसोबत व्हिडीओ कॉलवर बोलताना दिसत आहे. हा व्हिडीओ समोर येताच नेटकऱ्यांनी तीव्र नाराजी व्यक्त केली आहे.
मुंबईतील प्रसिद्ध लालबागचा राजा गणेशोत्सवाच्या काळात सेलिब्रिटींच्या उपस्थितीमुळे पुन्हा चर्चेत आला आहे. अभिनेत्री परिणीती चोप्राने 21 सप्टेंबर रोजी लालबागच्या राजाचं दर्शन घेतलं. यावेळी तिच्यासोबत पती आणि राज्यसभा खासदार राघव चड्ढा उपस्थित नव्हते. मात्र, परिणीतीने बाप्पाच्या दर्शनाचा हा खास क्षण पतीसोबत शेअर करण्यासाठी त्यांना थेट व्हिडीओ कॉल केला. या प्रसंगाचा व्हिडीओ सोशल मीडियावर व्हायरल झाल्यानंतर काही नेटकऱ्यांनी तिच्यावर टीका केली आहे. परिणीती गुलाबी रंगाच्या अनारकली ड्रेसमध्ये लालबागच्या राजाच्या दरबारात पोहोचली होती. तिने बाप्पासमोर काही वेळ थांबून दर्शन घेतलं. त्यानंतर तिने राघव चड्ढांना व्हिडीओ कॉल केला आणि त्यांनाही बाप्पाचं दर्शन घडवलं. एका बाजूला सर्वसामान्यांना धक्काबुक्की होत असताना, सेलिब्रिटींना मात्र निवांत दर्शन मिळतं, यावरून नेटकऱ्यांनी नाराजी व्यक्त केली आहे.
व्हिडीओ पाहून नेटकऱ्यांचा संताप
परिणीतीचा व्हिडीओ व्हायरल झाल्यानंतर सोशल मीडियावर वेगवेगळ्या प्रतिक्रिया उमटू लागल्या. विशेषतः व्हीआयपी दर्शनाच्या मुद्द्यावरून काही नेटकऱ्यांनी प्रश्न उपस्थित केले. सर्वसामान्य भाविकांना लालबागच्या राजाच्या दर्शनासाठी मोठ्या रांगेत तासन्तास उभं राहावं लागतं, तर सेलिब्रिटींना तुलनेने अधिक वेळ आणि सुविधा मिळतात, असं नेटकरी म्हणाले. ‘लालबागचा राजा हा फक्त सेलिब्रिटींचा गणपती आहे, सर्वसामान्यांसाठी नाही’, असं एकाने लिहिलं आहे. तर ‘कोणी तिलासुद्धा सर्वसामान्यांप्रमाणे धक्काबुक्की करू शकेल का’, असा खोचक सवाल दुसऱ्या युजरने केला. इतकी गर्दी असताना व्हिडीओ कॉलवर बोलतेय, हे चुकीचं आहे.. असंही काहींनी म्हटलं आहे.
पहा व्हिडीओ-
परिणीतीच्या व्हिडीओमुळे पुन्हा एकदा लालबागच्या राजाच्या दरबारातील व्हीआयपी व्यवस्थेवर सोशल मीडियावर चर्चा सुरू झाली आहे. काही सोशल मीडिया युजर्सनी परिणीतीपेक्षा मंडपातील व्यवस्थेवर अधिक प्रश्न उपस्थित केले. सेलिब्रिटींना विशेष सुविधा का दिल्या जातात, तर सामान्य भाविकांना कमी वेळेत दर्शन घेऊन पुढे का जावं लागतं, असा मुद्दा त्यांनी मांडला.
परिणीती चोप्राने 24 सप्टेंबर 2023 रोजी राघव चड्ढाशी लग्न केलं असून 19 ऑक्टोबर 2025 रोजी त्यांच्या पहिल्या मुलाचा जन्म झाला.
