Rhea Chakraborty: रिया चक्रवर्तीला मिळालं नवं प्रेम; सुशांतच्या निधनानंतर 2 वर्षांनी ‘या’ व्यक्तीला करतेय डेट
रिया चक्रवर्ती 'या' बिझनेसमनला करतेय डेट; सुशांतला विसरून आयुष्यात गेली पुढे
मुंबई: अभिनेत्री रिया चक्रवर्ती 2020 मध्ये सुशांत सिंह राजपूतच्या निधनानंतर सर्वाधिक चर्चेत आली. सुशांतच्या मृत्यूप्रकरणातील ड्रग्जच्या अँगलचा तपास होत असताना त्यात रिया आणि तिचा भाऊ शौविकचं नाव समोर आलं होतं. या दोघांना अटकही झाली होती. जामिनावर सुटल्यानंतर रिया बरेच दिवस माध्यमांपासून आणि सोशल मीडियापासून दूर होती. आता पुन्हा एकदा रिया चक्रवर्ती लाइमलाइटमध्ये आली आहे. रियाच्या आयुष्यात नवं प्रेम आल्याची सध्या जोरदार चर्चा आहे.
अभिनेत्री अंकिला लोखंडेशी ब्रेकअप झाल्यानंतर सुशांत रियाला डेट करत होता. हे दोघं काही दिवस लिव्ह-इन रिलेशनशिपमध्येही राहिले होते, अशीही चर्चा होती. सुशांतच्या निधनानंतर रियाने अनेकदा त्याच्याविषयीचं प्रेम व्यक्त केलं. आता ती बंटी सजदेहला डेट करत असल्याचं समजतंय.
कोण आहे बंटी सजदेह?
बंटी हा रिॲलिटी स्टार आणि फॅशन डिझायनर सीमा सजदेहचा भाऊ आहे. सीमा ही सोहैल खानची पूर्वाश्रमीची पत्नी आहे. स्पोर्ट्स आणि एंटरटेन्मेंट क्षेत्रातील एका मोठ्या टॅलेंट मॅनेजमेंट कंपनीचा तो मालक आहे. काही वर्षांपूर्वी रियासुद्धा त्याच्या टॅलेंट मॅनेजमेंट कंपनीची एक क्लाएंट होती, अशी माहिती समोर आली आहे. काही महिन्यांपासून बंटी आणि रिया एकमेकांना डेट करत असल्याचं कळतंय.
गेल्या काही वर्षांत रियाने ज्या काही समस्यांचा सामना केला, त्यात बंटीने तिची खूप साथ दिली. सुशांतला फसवल्याचा आरोप रियावर होत असताना बंटी तिच्या पाठिशी कायम होता, असंही म्हटलं जातंय.
जेव्हा रियाविरोधात विविध खटले दाखल झाले, तेव्हा बंटीलाही चौकशीसाठी समन्स बजावण्यात आले होते. याशिवाय 7 ऑक्टोबर रोजी बंटीच्या बर्थडे पार्टीतही रियाला पाहिलं गेलं. याआधी बंटी हा अभिनेत्री सोनाक्षी सिन्हाला डेट करत होता.
