Tukaram Mundhe: इट्स डन सिस.., तुझ्या कॅफेमध्ये तुकाराम मुंढेंना पाठवेन; सलमानचा खास मैत्रिणीलाच इशारा

Salman Khan: बॉलिवूडचा दबंग स्टार सलमान खान त्याच्या हटके अंदाजासाठी ओळखला जातो. आता त्याची एक सोशल मीडिया पोस्ट चांगलीच चर्चेत आली आहे. सलमानने त्याच्या मैत्रिणीच्या वांद्रे इथल्या नव्या कॅफेला शुभेच्छा देताना महाराष्ट्राचे अन्न आणि औषध प्रशासन विभागाचे (FDA) आयुक्त तुकाराम मुंढे यांचा मजेशीर अंदाजात उल्लेख केला. कॅफेमध्ये स्वच्छता आणि अन्नाची गुणवत्ता योग्य ठेवली नाही, तर मुंढेंना तपासणीसाठी पाठवेन, असा मिश्कील इशाराच त्याने दिला.

सलमानच्या मैत्रिणीने वांद्रे इथं नवीन कॅफे सुरू केलं आहे. या कॅफेची माहिती सोशल मीडियावर शेअर करताना सलमानने त्याला पाठिंबा दर्शवला. मात्र, शुभेच्छा देतानाच त्याने त्याच्या खास विनोदी शैलीत कॅफेच्या स्वच्छतेची जबाबदारीही मालकावर टाकली. ‘स्वच्छता व्यवस्थित ठेव, नाहीतर मी तुकाराम मुंढेंना पाठवेन,’ अशा आशयाची त्याची पोस्ट आहे. त्याच्या या मजेशीर कमेंटमुळे सोशल मीडियावर चर्चा सुरू झाली आहे.

सलमानची पोस्ट-

‘सृष्टी माझी कॉफी रिफिल करून दे प्लीज, किंमत वाढवू नकोस, गुणवत्ता कायम ठेव, स्वच्छता राख, नाहीतर मी त्यांना (तुकाराम मुंढे) इथे पाठवेन आणि मग ‘इट्स डन सिस’. एकेदिवशी मी इथे माझं बीईंग ह्युमनचं टी-शर्ट आणि जीन्स घालून येईन. तुझ्यासाठी मी खूप खुश आहे. या व्हिडीओत जी व्यक्ती बोलत आहे, तीच या कॅफेची मालकीण आहे आणि तीच बॅटमॅन आहे’, असं त्याने लिहिलं आहे.

महाराष्ट्र FDA आयुक्त म्हणून तुकाराम मुंढे सध्या अन्न सुरक्षेबाबतच्या कठोर कारवाईमुळे चर्चेत आहेत. रेस्टॉरंट्स, खाद्यपदार्थ विक्रेते, डेअरी आणि इतर आस्थापनांमध्ये स्वच्छता आणि अन्नसुरक्षा नियमांचे उल्लंघन आढळल्यास FDAकडून कारवाई केली जात आहे. त्यांच्या धडक कारवाईमुळे त्यांची ‘कडक अधिकारी’ अशी प्रतिमा निर्माण झाली आहे.

अलीकडेच मुंढे यांनी एका रेस्टॉरंटमधील अनुभवही सांगितला होता. मित्रासोबत जेवायला गेले असताना त्यांनी रेस्टॉरंटमधील काही नियमांचे पालन होत नसल्याचं पाहिलं. विशेष म्हणजे, मित्राने ऑर्डर केलेल्या पनीरबाबतही त्यांना संशय आला आणि ते बनावट असल्याचं त्यांनी ओळखलं. त्यानंतर संबंधित रेस्टॉरंटला त्रुटी दूर करण्यासाठी 24 तासांची मुदत देण्यात आली. मुंढे यांच्या नेतृत्वाखाली FDAकडून मोठ्या प्रमाणावर तपासण्या सुरू आहेत. त्यांच्या म्हणण्यानुसार, अलीकडच्या काळात 3,100 हून अधिक तपासण्या, सुमारे 165 परवाने निलंबित आणि 750 हून अधिक आस्थापनांना सुधारणा नोटिसा देण्यात आल्या आहेत. अन्न सुरक्षा हा केवळ कारवाईचा विषय नसून नागरिकांच्या आरोग्याशी संबंधित मुद्दा असल्याचे त्यांनी स्पष्ट केलं आहे.