ठाण्यात हाय-प्रोफाईल देहव्यापार रॅकेटचा भंडाफोड! दलाल निघाली वेबसीरिजची अभिनेत्री, 2 अभिनेत्रींची सुटका

फिल्म इंडस्ट्रीच्या झगमगाटाच्या मागे एक काळे सत्य लपलेले असते असे आपण अनेकांच्या तोंडून ऐकतो. असाच एक धक्कादायक प्रकार समोर आला आहे. ठाण्या सारख्या शहरात हा प्रकार घडला आहे. अभिनय क्षेत्रात यश मिळवण्याचे स्वप्न पाहणाऱ्या महिलांना पैशांच्या मोहात पाडून देहव्यापारात ढकलण्याचे धक्कादायक प्रकरण उघडकीस आले आहे. ठाणे पोलिसांनी 26 वर्षीय एका हिंदी वेब सिरीज अभिनेत्रीला या प्रकरणी अटक केली आहे. ती स्वतः दलाली करत मुलींना या काळ्या धंद्यात ठकलत होती. या कारवाईत पोलिसांनी दोन महिलांची सुटका केली असून, त्यापैकी एक हिंदी टीव्ही मालिकांमध्ये काम करणारी अभिनेत्री आहे.

पोलिसांनी कसा रचला जाळा?

ठाणे पोलिसांच्या अनैतिक मानवी वाहतूक प्रतिबंध विभागाला गुप्त माहिती मिळाली होती की, एक महिला जास्त पैसे देण्याचे आमिष दाखवून मुलींना देहव्यापारासाठी उपलब्ध करून देते. या माहितीची पडताळणी करण्यासाठी पोलिसांनी ‘बनावट ग्राहक’ पाठवले आणि आरोपी महिलेशी संपर्क साधला. आरोपीने “आमच्याकडे हिंदी वेब सिरीज आणि टीव्ही मालिकांमध्ये काम करणाऱ्या मुली उपलब्ध आहेत” असे सांगत काही फोटो पाठवले. व्यवहार ठरल्यानंतर ती दोन मुलींना घेऊन ठाण्यातील वागळे इस्टेट परिसरातील एका हॉटेलमध्ये आली. तेथे आधीच सापळा रचून बसलेल्या पोलिसांनी छापा टाकून तिला रंगेहाथ पकडले.

अभिनयातून देहव्यापाराकडे का वळली?

तपासात समोर आलेली माहिती अधिकच आश्चर्यचकीत करणारी आहे. अटक झालेली २६ वर्षीय तरुणी स्वतः हिंदी वेब सिरीजमध्ये अभिनय करते. ती मुंबईत भाड्याच्या घरात राहते. नियमित काम आणि पुरेसे उत्पन्न न मिळाल्याने, घरखर्च, बहिणीचे शिक्षण, गावातील आई-वडिलांना पैसे पाठवणे आणि स्वतःच्या चैनीच्या सवयी पूर्ण करण्यासाठी तिने हा अवैध मार्ग निवडला. एका व्यक्तीच्या संपर्कात येऊन तिने हे रॅकेट सुरू केले.

पोलिसांची कारवाई

या कारवाईत 40 आणि 48 वर्षांच्या दोन महिलांची सुटका करण्यात आली. न्यायालयाने आरोपीला 26 फेब्रुवारीपर्यंत पोलीस कोठडी सुनावली आहे. वागळे इस्टेट पोलीस ठाण्यात याप्रकरणी गुन्हा दाखल झाला असून, रॅकेटमागे आणखी कोण सामील आहे का? याचा तपास सुरू आहे.