हतबल झालोय, असहाय्य वाटतंय, माणसाची किंमतच..; CJP आंदोलनावर मराठी कलाकार व्यक्त

केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी काढलेल्या मोर्चामध्ये विद्यार्थी-तरुण आंदोलकांना पोलीस आणि निमलष्करी दलांच्या जवानांकडून झालेल्या क्रूर मारहाणीचे देशभरात तीव्र पडसाद उमटले आहेत. नीटच्या परीक्षेतील गैरव्यवहारप्रकरणी धर्मेंद्र प्रधान यांच्यावर कारवाई करण्याची मागणी महिनाभर करूनही केंद्र सरकारने दखल घेतली नव्हती. आता या संपूर्ण आंदोलनावर आणि विद्यार्थ्यांवरील लाठीचार्जवर देशभरातून प्रतिक्रिया उमटत आहेत. विविध मराठी कलाकारसुद्धा सोशल मीडियावर मोकळेपणे व्यक्त होत आहेत. अभिनेता सुबोध भावे, अतुल कुलकर्णी, पूर्वा कौशिक, रसिका सुनिल यांसारख्या सेलिब्रिटींनी सोशल मीडियाद्वारे विद्यार्थ्यांच्या या आंदोलनाला पाठिंबा दर्शविला आहे.

सुबोध भावेची पोस्ट-

‘संवाद- तो नसतो तेव्हा विसंवाद सुरू होतो. आंदोलन करणारे तरुणही याच देशाचे आहेत आणि काठ्या चालवणारेही. निर्णय घेणारेही याच देशाचे आहेत आणि भरडले जाणारेही. हा प्रश्न या देशातील स्वप्न बघणाऱ्या लाखो तरुणांच्या किंबहुना आपल्याच देशाच्या भविष्याच आहे. ज्यांच्या हातात निर्णय घेण्याची क्षमता आणि अधिकार आहेत, त्यांनी संवेदनशील होऊन निर्णय घ्यावा हीच विनंती आणि इच्छा. भारतीय एकमेकांशी झुंजताना पाहणं ही काही फार सुखावह गोष्ट नक्कीच नाही. शरीरावर झालेल्या जखमा भरून येतील, पण मनावर झालेल्या जखमा खोल जाण्याआधी संवाद घडो हीच प्रार्थना’, अशी पोस्ट अभिनेता सुबोध भावेनं लिहिली आहे.

पूर्वा कौशिकला कोसळलं रडू

View this post on Instagram

A post shared by Purva kaushik (@kaushikpurva14)

झी मराठी वाहिनीवरील मालिकांमधून लोकप्रिय झालेली अभिनेत्री पूर्वा कौशिकनेही सोशल मीडियावर एक व्हिडीओ पोस्ट केला आहे. त्यात ती म्हणाली, ‘मला खरंच वाटलं नव्हतं की मी असा व्हिडीओ शूट करेन. पण काही गोष्टी सहन होत नाहीयेत. खूप हलबल झाल्यासारखं वाटतंय. आपण कुणीच काहीच करू शकत नाही, याचं वाईट वाटतंय. माणसं मरतायत, लोकशाही असलेल्या देशात हे सगळं सुरू आहे. आपण सध्या काय करतोय, दोन वेळचं खातोय, झोपतोय. पण आपल्यासाठीच जे लोक लढत आहेत, त्यांचं काय होतंय? त्यांना आपण कोणत्या पद्धतीने मदत करू शकतो हे पहावं लागेल. हे जे काही सुरू आहे, ते लवकरात लवकर थांबावं, कारण माणसाची किंमत इतकी कमी आहे, हे मला माहीत नव्हतं.’ या व्हिडीओमध्ये पूर्वा रडतानाही दिसतेय.

अतुल कुलकर्णींची कविता-

बीस जुलाई की अगली सुबह… pic.twitter.com/FIbxOpWecY

— atul kulkarni (@atul_kulkarni) July 21, 2026

रसिका सुनीलकडून संताप व्यक्त

अभिनेत्री रसिका सुनीलने तिच्या इन्स्टा स्टोरीमध्ये लिहिलंय, ‘हे सगळं पाहून मन अक्षरश: तुटतंय. असहाय्य वाटतंय आणि रागही येतोय. हे अजिबात योग्य नाही. लाज वाटली पाहिजे. एखाद्याला इतकंसं समजावून सांगण्यासाठी कोणीतरी पटकथा लिहून द्यावी लागेल का? संवाद हा पर्याय असू शकतो.’