आंदोलनादरम्यान पतीला ताब्यात घेताच स्वरा भास्करची संतप्त पोस्ट; म्हणाली ‘लज्जास्पद..’
केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी मुंबईतही आंदोलनं झाली. या आंदोलनादरम्यान अभिनेत्री स्वरा भास्करचा पती फहाद अहमदला पोलिसांनी ताब्यात घेतलं. याचा व्हिडीओ पोस्ट करत तिने संताप व्यक्त केला.
नीट पेपरफुटीनंतर केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत दिल्लीतील जंतर मंतर याठिकाणी विद्यार्थ्यांचं आणि तरुणांचं आंदोलन सुरू आहे. कॉक्रोच जनता पार्टीच्या नेतृत्वाखाली सुरू असलेलं हे आंदोलन फक्त दिल्लीपुरतं मर्यादित नाही. सोमवारी मुंबईतही निदर्शने झाली आणि असंख्य लोक कॉक्रोच जनता पार्टीच्या समर्थनार्थ रस्त्यावर उतरले. या आंदोलनात अभिनेत्री स्वरा भास्करचा पती आणि राजकीय कार्यकर्ता फहाद अहमदचाही समावेश होता. या आंदोलनादरम्यान फहादला पोलिसांनी ताब्यात घेतलं. त्यानंतर स्वराने सोशल मीडियावर व्हिडीओ शेअर करत संताप व्यक्त केला.
स्वरा भास्करने फहादला पोलिसांनी ताब्यात घेतल्याचा व्हिडीओ इन्स्टाग्रामवर शेअर केला आहे. या व्हिडीओमध्ये मुंबई पोलीस आंदोलनादरम्यान फहादची कॉलर पकडून त्याला पोलीस व्हॅनमध्ये नेत असल्याचं दिसत आहे. तर फहात त्या अधिकाऱ्यांना विचारतोय, “तुम्ही मला का अटक करत आहात?” हा व्हिडीओ दुपारी साडेचार वाजताच्या सुमारास रेकॉर्ड करण्यात आला होता. फहादचा व्हिडीओ शेअर करत स्वराने लिहिलं, ‘मुंबई पोलिसांनी 20 जुलै 2026 रोजी दुपारी 4.30 वाजता चैत्यभूमी इथं फहाद आणि इतर आंदोलकांना ताब्यात घेतलं. त्याला माहीम पोलीस ठाण्यात ताब्यात ठेवण्यात आलं आहे. ही भारताची लोकशाही आहे. लज्जास्पद!’
View this post on Instagram
आणखी एका व्हिडीओमध्ये फहाद पोलिसांच्या गाडीत बसून घटनास्थळावरील परिस्थितीचं वर्णन करताना दिसत आहे. स्वरानेही त्याचा हा व्हिडीओ शेअर केला आहे. फहादनेच व्हिडीओ शेअर करण्यास सांगितल्याचं म्हणत स्वराने इतर आंदोलकांनाही त्याठिकाणी शांतपणे जमण्याचं आव्हान केलं.
कॉक्रोच जनता पार्टीने सोमवारी दिल्लीत ‘चलो संसद’ मोर्चा काढला. या मोर्चात अनेक बॉलिवूड सेलिब्रिटीसुद्धा सहभागी झाले होते. अभिनेत्री शबाना आझमी, प्रकाश राज हे आंदोलनात दिसले. शबाना आझमी यांनी इन्स्टाग्रामवर आंदोलनाचे अनेक व्हिडीओ शेअर केले होते. आंदोलनादरम्यान त्यांची तब्येतही बिघडली होती. त्यानंतर काहींनी त्यांची मदत करत त्यांना सुरक्षित ठिकाणी घेऊन गेले होते.रितेश देशमुख आणि जिनिलिया देशमुख यांनीही टविट करून विद्यार्थ्यांवरील कारवाईचा निषेध केला. याशिवाय अभिनेता-गायक दिलजित दोसांज, अभिनेता आणि कॉमेडियन वीर दास, दिग्दर्शक अनुराग कश्यप, अभिनेत्री सोनाक्षी सिन्हा, हुमा कुरेश यांनीही विद्यार्थ्यांवरील कारवाईचा निषेध केला.
