उदित नारायण यांनी श्रेया घोषाल, अलका याज्ञिक यांनाही केलं होतं किस; चकीत झाल्या होत्या गायिका

गायक उदित नारायण सध्या त्यांच्या एका वादग्रस्त व्हिडीओमुळे सोशल मीडियावर चर्चेत आहेत. या व्हिडीओमध्ये ते लाइव्ह कॉन्सर्टदरम्यान एका चाहतीच्या ओठांवर किस करताना दिसून येत आहेत. शनिवारी सकाळपासून त्यांचा हा व्हिडीओ सोशल मीडियावर वाऱ्याच्या वेगाने व्हायरल होत असून त्यावर विविध प्रतिक्रिया येत आहेत. इतक्या मोठ्या गायकाला अशा प्रकारचं वागणं शोभून दिसत नाही, अशी टीका नेटकऱ्यांनी केली. याचदरम्यान उदित नारायण यांचे आणखी काही जुने व्हिडीओसुद्धा चर्चेत आले आहेत. यामध्ये ते प्रसिद्ध गायिका श्रेया घोषाल आणि अलका याज्ञिक यांना अचानक किस करताना दिसून येत आहेत.

यातील एक व्हिडीओ पुरस्कार सोहळ्यातील असून गायक उदित नारायण त्यावेळी मंचावर उभे असतात आणि श्रेया घोषाल पुरस्कार घेण्यासाठी मंचावर येते. तेव्हा उदित नारायण हे अचानक श्रेयाच्या गालावर किस करतात. यावेळी श्रेयाच्या चेहऱ्यावर चकीत झाल्याचे भाव सहज दिसून येतात. त्याचप्रकारे ते अलका याज्ञिक यांच्याही गालावर किस करतात. या व्हिडीओवर नेटकऱ्यांकडून विविध प्रतिक्रिया येत आहेत. अनेकांनी त्यांची तुलना अभिनेता इमरान हाश्मीशी केली आहे. ‘उदित हाश्मी’ असे कमेंट्स नेटकऱ्यांनी केले आहेत. तर ‘जमान्यासोबत चालत आहेत’, असं दुसऱ्याने म्हटलंय.

दरम्यान एका आंतरराष्ट्रीय कॉन्सर्टमधील उदित नारायण यांचा जुना व्हिडीओ शनिवारी सकाळपासून सोशल मीडियावर चर्चेत आला. यामध्ये ते स्टेजवर परफॉर्म करताना काही चाहते त्यांच्यासोबत सेल्फी काढण्यासाठी येतात. यावेळी एक चाहती आधी त्यांच्या गालावर किस करते. त्यानंतर उदित तिच्या ओठांवर किस करतात. त्यांच्या अशा वागण्यावरून बरीच टीका होत आहे. मात्र मी कोणतंही लज्जास्पद कृत्य केलं नसल्याचं उदित यांनी म्हटलंय.

“इतका जुना व्हिडीओ आता कसा काय व्हायरल होतो? हे संशयास्पद आहे माझी प्रतिमा मलिन करण्यासाठी हे केलं जातंय. पण तुम्ही मला कितीही खाली पाडलात, तरी मी वरच जाईन. मी चुकीचं असं काहीच केलं नाही. माझे चाहते माझ्यावर प्रेम करतात आणि मीसुद्धा त्यांच्यावर खूप प्रेम करतो”, अशी प्रतिक्रिया त्यांनी या व्हिडीओवर दिली.