आधी वजन कमी कर, मग..; ‘गुलाबी साडी’ फेम अभिनेत्रीचा संघर्ष, आता कास्टिंग डायरेक्टर स्पष्टच बोलली..
अभिनेत्री अंजली आनंद 'गुलाबी साडी'च्या हिंदी व्हर्जनमुळे तुफान चर्चेत आली. मात्र वजनामुळे इंडस्ट्रीत बराच संघर्ष करावा लागल्याचा खुलासा तिने एका मुलाखतीत केला होता. यावर आता कास्टिंग डायरेक्टरची पोस्ट नेटकऱ्यांचं लक्ष वेधून घेत आहे.
बॉलिवूडमध्ये कलाकारांच्या निवडीदरम्यान दिसणं, फिटनेस आणि वजन यांना किती महत्त्व दिलं जातं, यावर पुन्हा एकदा चर्चा सुरू झाली आहे. अभिनेत्री अंजली आनंदने नुकतंच तिच्या करिअरच्या सुरुवातीच्या संघर्षाबद्दल बोलताना कास्टिंग डायरेक्टर शानू शर्मासोबतच्या एका जुन्या संवादाचा उल्लेख केला होता. त्यानंतर आता शानू शर्माने सोशल मीडियावर केलेली एक पोस्ट चर्चेचा विषय ठरली आहे. या पोस्टद्वारे तिने अंजलीला टोला लगावल्याचं म्हटलं जात आहे. शानू शर्मा ही यशराज फिल्म्सची (YRF) कास्टिंग डायरेक्टर म्हणून ओळखली जाते. तिने इन्स्टाग्रामवर एक पोस्ट शेअर करत, ‘I hope the next big trend is talent’ (यापुढील मोठा ट्रेंड हा ‘टॅलेंट’ असावा अशी मी आशा करते) असं लिहिलं. अंजली आनंदने काही दिवसांपूर्वी कास्टिंगशी संबंधित अनुभव सांगितल्यानंतर ही पोस्ट समोर आल्याने सोशल मीडियावर विविध चर्चा सुरू झाल्या आहेत. शानूने हा अंजलीलाच हा टोमणा मारल्याचं म्हटलं जात आहे.
या पोस्टवर बॉलिवूडमधील अनेक कलाकारांनी प्रतिक्रिया दिल्या. भूमी पेडणेकर, शालिनी पासी आणि अंकिता लोखंडे यांनी पोस्टवर प्रतिक्रिया देत समर्थन दर्शवलं. अभिनेता शार्दुल पंडितनेही टॅलेंटच्या मुद्द्यावर आपली प्रतिक्रिया व्यक्त केली. फराह खानच्या यूट्यूब चॅनेलवरील एका संवादात अंजलीने 2020 मधील तिच्या कठीण काळाची आठवण सांगितली. कोरोनाच्या काळात काम मिळत नसल्याने आर्थिक अडचणी निर्माण झाल्या होत्या. तिच्या बचतीचे पैसेही संपली होती आणि ती काही काळ एकटी भाड्याच्या घरात राहत होती. या परिस्थितीत अभिनय सोडून भारताबाहेर जाण्याचाही विचार मनात आल्याचं तिने सांगितलं.
शानू शर्माची पोस्ट-
View this post on Instagram
याच काळात तिचा शानू शर्माशी संपर्क झाला. याआधी भूमिकांसाठी झालेल्या भेटींमध्ये शानूने तिला वजन कमी केल्यानंतर कामाबाबत विचार करू, असं सांगितल्याचं अंजलीने म्हटलं. मात्र, नंतर शानूनेच तिला करण जोहरच्या चित्रपटातील भूमिकेसाठी ऑडिशनची संधी दिली. ऑडिशननंतर अंजलीला करण जोहर दिग्दर्शित ‘रॉकी और रानी की प्रेम कहानी’मध्ये काम करण्याची संधी मिळाली. या चित्रपटात तिने रणवीर सिंहच्या बहिणीची, गायत्री ‘गोलू’ रंधावाची भूमिका साकारली होती. या भूमिकेमुळे अंजलीला मोठ्या पडद्यावर चांगली ओळख मिळाली.
शानू शर्मांच्या पोस्टनंतर टॅलेंट, शरीरयष्टी, ओळखी आणि बॉलिवूडमधील संधी यावर सोशल मीडियावर चर्चा रंगली आहे. काही कलाकारांनी ‘टॅलेंट’ला महत्त्व मिळावं, अशी भूमिका व्यक्त केली, तर काही प्रतिक्रियांमध्ये केवळ टॅलेंटच्या आधारे संधी मिळण्याबाबत प्रश्न उपस्थित करण्यात आले.
